SUPERBALITA CEBU

Sugilanon: Lalake nga yaya

ALCEA MANINGO

Cangyan, Carmen, Cebu


NAGLABAD ang ulo ni Zaldy sa kalibog. Nakuha na niya ang DNA test result ni Lenny, siyete anyos. Dili siya ang amahan sa bata. Naglibog siya kon kadaugan ba o kapildihan ba niya ang resulta. Nasuod na kayo siya sa bata. Siya ang namat-an nga amahan ni Lenny nga mas moparayeg pa kaniya kaysa inahan niini. Siya ang nag-atiman niini gikan pa sa pagka puya. Abi gani niyag siya gyuy amahan ni Lenny. Naglaom siya nga mao unta kanay mahimong resulta sa DNA test. Unsaon nga kining kaipon niyang si Perla, nga dugay na niyang uyab, nakigpuyo kaniya dihang namabdos na. Nakaduwa man diay og una sa laing teym. Hilom siya nga nahimong “salvador del mundo.”

Naghinuktok si Zaldy karong hapuna samtang naglingkod sa terasa sa balay sa iyang Mama Gina ning lungsod sa Amiraw. Ang iyang inahan maoy namugos nga pakuhaan og DNA test si Lenny, kay wala kini kauyon kang Perla. Samtang nagtrabaho sa Amerika si Gina isip hotel receptionist, daghan siyag mga ‘eye and ear’ sa ilang mga silingan sa Amiraw. Maniid sila kang Perla ug mo-teks dayon kang Gina kon may himatikdan sila nga dili nila mauyonan.

Alang kang Zaldy nagtinarong man si Perla sa ilang panag-ipon. Sama ra gayud nga kini tinuod nga asawa niya. Nag-atiman kini kang Zaldy ug sa bata sa panimalay. Siya ang kusinera. Sa adlawng Sabado ug Dominggo manglimpiyo sa balay ug manglaba sa mga bulingon. Nagtrabaho si Perla isip factory worker sa usa ka kompiniya sa ilang lungsod. Si Zaldy way trabaho kay hilabihang tapulana. Nagsalig lang sa ipadala sa iyang inahan matag bulan. Hinuon, kon tinarungon paggasto, ang binulan nga P20,000 subra kaayo nila. Apan may bisyo sa shabu si Zaldy. Hinuon kontrolado niya ang maong bisyo. Wa man gyud siya ma-praning.

Wa makabalibad si Zaldy nga kuhaan og DNA test si Lenny, kay mihulga man si Mama Gina niya putlon ang binulan nga alawans kon dili siya motuman. Naminyo og Amerkano si mama niya ug sa pinansiyal nga natampo sa iyang bana nakapatukod siyag maanindot nga bungalow nga maoy gipuy-an ni Zaldy. Nabiyuda si Gina ug nakabana na sab og laing Amerkano. Wa siyay anak sa iyang mga na-bana kay puro na mga tiguwang.

Si Zaldy nga guwapo ug tisoy og hitsura masaypan nga anak sa Amerkano. Anak siya ni Gina sa pagka dalaga nga nabiktima sa pasalig sa unang gugma. Wa makaila si Zaldy sa iyang amahan. Gilubong ni Gina sa kalimot si Elmo nga klasmeyt niya sa hayiskol. Si Gina ra gayud ang nagmatuto kang Zaldy nga pinatuyangan sa gusto tungod sa kaabunda sa kuwarta. Wa siya kahuman og tungha sa hayiskol tungod sa barkada ug bisyo. Hinuon, nahimo siyang responsable nga tawo dihang miabot si Lenny sa iyang kinabuhi. Siya ang tighatod-kuha ni Lenny sa eskuylahan. Mas suod niya ang bata kaysa inahan niini. Tibuok adlaw atua sa trabahoan si Perla. Si Zaldy nahimong “yayo” (lalakeng yaya) ni Lenny nga gituohan niya nga siya gyud ang amahan.

NAGAGUNIT karon si Zaldy sa dokumento nga nagmatuod nga dili siya ang amahan ni Lenny: “Not the biological father of he child!” Mao kini ang gikagul-an niya pag-ayo. Nagpangusmo siya sa kaitok. Nagpaminti. Mihangad-hangad sa langit. Gidapuwas niya sa iyang palad ang iyang nawong ug unya gikawot niya ang iyang ulo. Mangayo ra ba og kupya sa dokumento si mama Gina niya.

Unya may mikidlap sa iyang hunahuna. Sa umaabot nga Dominggo way klase ug way trabaho. Moadto siya sa siyudad. May higala siya kaniadto nga eksperto sa pag-tamper o pag-usab sa papeles diha sa aseras. Batid sa paghimo o pag-usab og school report card, transcript of record, birth certificate o bisan diploma. Ipa-tamper niya ang DNA result certificate ni Lenny. Ipa-papas niya ang “Not” aron mahibilin ang “the biological father.” Ang photocopy maoy ipadala niya sa iyang mama Gina. Nahuwasan siya sa labad sa ulo. Nanghupaw siya, mibarog ug nanaog. Giandam niya ang iyang motorsiklo. Kuhaon na niya si Lenny sa eskuylahan. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph