Gisugat ang abo ni anhing Kongresista Raul Del Mar sa seramonyas sa usa ka bayani sa iyang pag-abot sa Mactan Cebu International Airport (MCIA) kagahapon sa buntag, Disyembre 2.
Si Lapu-Lapu City Mayor Junard Chan uban sa mga kadagkoan sa MCIA, mga kauban niya sa partido sa kongresista nga Bando Osmeña Pundok Kauswagan (BOPK), pipila ka kabanay ug mga higala mao ang ningyukbo sa abo nga gisud sa urn.
Si Del Mar Mar nakabsan sa iyang kinabuhi didto sa Manila niadtong Nobiyembre 16, 2020.
Ang iyang anak nga si kanhi Kongresista Cutie Del Mar maoy gabitbit sa iyang abo.
Samtang si Ryan, ang kamanghoran anak ni Del Mar, maoy nagdala sa bandila sa Pilipinas dihang nitugpa ang abyon nga ilang gisakyan, alas 10:00 sa buntag.
Si Cutie niasoy nga bisan sa pangidaron sa iyang amahan nga 79 anyos, apan wala kini napalta sa iyang sisyon didto sa Kongreso kinsa nakaserbisyo og 27 ka tuig sulod sa 9 termino.
“He always said once you’re a congressman, you’re a public servant and may everything that my dad has done remains in your heart forever,” padayag ni Cutie.
“My father only had two breaks from the Congress (11th ug 15th Congress). Flying home in every single weekend for 27 years and never once he complained. That’s how much he loved serving the Filipino people,” matod ni Cutie, kinsa maoy chief of staff sa iyang amahan.
Ang mga kaalyado ni Del Mar sa BOPK ug nga personal nga amigo ningsugat kaniya ug nisunod sa convoy paingon sa Cebu Port Authority (CPA) nga naumol gumikan sa iyang pagpasar og balaud didto sa Kongreso.
Human sa kapin usa ka oras nga pagpahimutang sa iyang abo, gibiyahe na usab kini padulong sa Basilica Minore del Sto. Niño para sa ipahigayon nga misa ug public viewing.
Si kanhi mayor Tomas Osmeña, kinsa maoy lider sa BOPK, nihulagway nga dako daghan pa og nahimo nga balaod ug daghan pag proyekto si Del Mar ikumpara aa ubang mga senador.
Si Osmeña nagkanayon nga si Del Mar magsilbing inspirasyon sa kabatan-onan gumikan sa serbisyo nga iyang gipakita sa wala pa siya nipanaw.
Kon ang kanhi mayor maoy pabut-on, gusto siya nga usbon ang pangalan sa MCIA ug ipahinungod ang pangalan niini ngadto sa namatay nga kongresista.
Karong adlawa, Disyembre 3, ang abo ni Del Mar dad-on sa Parish of the Our Lady of the Sacred Heart sa D. Jakosalem St. (PAC)