Gibutyag ni Department of the Interior and Local Government (DILG) Secretary Eduardo Año nga iyang pa-imbestigahan ang nahitabo nga mass gathering o panagtapok sa mga lumolupyo sa Madridejos, Bantayan Island atol sa pagbisita sa delegasyon nga gipangulohan ni Cebu Governor Gwen Garcia niadtong Biyernes. Ang maong kalihukan mao ang inaugural flight gikan sa Mactan airport ngadto sa bag-ong gibuksan nga tugpahanan sa Bantayan Island. Kini tipik ug kabahin sa Suroy-Suroy sa Sugbo. Moimbestigar usab ang DepEd 7 kay dihay nakita nga mga estudyante nga naka-uniform.
Didto usab sila si Presidential Spokesperson Secretary Harry Roque ug Office of the Presidential Assistant for the Visayas (Opav) Secretary Mike Dino. Ambot og kinsay nag-organized sa mga tawo nga motambong sa kalihukan sa Kota Park nga klaro sa mga hulagway nga nanggawas sa social media nga wala mo-obserbar sa social distancing. Wala ako magtumbok nga si Gov.
Garcia ang nagmando sa panagtapok.
Paimbestigahan daw ni Año. Okey. Apan makapaabot kaha kita nga adunay resulta sa maong imbestigasyon labi pa kay tag-as nga mga opisyal ang mga nanambong o nahilambigit sa maong kalihukan? Makapaabot kaha kita nga adunay masilutan sama sa ultimong mga tawo nga sayon-sayonon lang og dakop ug multahan kon makahimo og salaod?
Sama sa langit ug yuta ang kalainan sa kabus ug adunahan ning nasud. Ug kining isyu sa mga kabus nga kanunay pahimuslan ug yatakan sa mga adunahan ug gamhanan maoy usa ka nangaraan na nga drama sa tinuod nga kinabuhi natong mga Pinoy. Gani matag kabati nato nga ang mga gamhanang taga-gobiyerno mosaad nga moimbestigar ug mosilot sa sama kanilang gamhanan, dili kalikayan nga mamarog ang balhibo sa atong tangkugo ug mo-aksiyon kitag digwa kay dili maantos ang kadakong minaot nga gipakita ning mga tawhana.
Kanus-a ba sila maminaw kanato nga lisod na kaayong tuhuan ang ilang mga pasalig nga dunay masilutan kanila? Kay sayod kita niadto pa nga “mikita nang maong script.” Ug busa ato silang tambagan nga “practice what you preach or change your speech.” (bobbygnalzaro@gmail.com)