MOABOT sa 6,000 ka mga indibidwal gikan sa nagkadaiyang mga lugar sa lalawigan sa Sugbo ang kasamtangan nga giatiman sa nagkalain laing lokal nga kagamhanan gumikan sa baha.
Usa usab ka tawo ang namatay sa Dakbayan sa Danao human maanod.
Tungod sa nasinati nga pagbunok sa uwan sa Sugbo dala sa low pressure area (LPA), upat ka mga lungsod ug usa ka siyudad ang nakasinati og baha gumikan sa Low Pressure Area (LPA) sa nasud.
Apektado sa pag baha ang mga lungsod sa Asturias, Balamban, Compostela, Tuburan ug dakbayan sa Danao.
Subay sa taho gikan sa Cebu Provincial Disaster Risk Reduction and Management Office (PDRRMO) nakatala sa labing daghan nga naapektohan ang lungsod sa Tuburan.
Moabot sa 13 ka mga barangay ang nakasinati sa grabe nga pag baha tungod usab sa pag saka sa lebel sa tubig sa mga sapa nga mi-apekto sa moabot 2,610 ka mga indibidwal 1,735 ka mga pamilya ug 683 ka mga panimalay.
Nalakip usab sa apektadong lugar sa lungsod ang barangay 8, Amatugan, Caridad, Colonia, Fortaliza, Jagbuaya, Mag-atubang, Mag-alwa, Mag-antoy, Mangga, Marmol, Poblacion, Portalisa.
Gawas sa Tuburan moabot 158 ka mga pamilya ug 681 ka mga indibidwal ang apektado sa pag baha sa lungsod sa Asturias, tungod sa pagsaka sa lebel sa tubig sa sapa.
Sa lungsod sa Balamban, sobra sa 100 usab ka mga panimalay ang apektado sa tulo ka mga barangay sa lungsod. Kini mao ang barangay Baliwagan, Cantuod ug Nangka.
Matod ni Balamban Mayor, Alex Binghay nga paspas ang pag saka sa tubig baha sa sapa tungod sa way hunong nga uwan og ang pag taob sa dagat.
“Naay usahay mo kusog mo hinay pero ang akong kapitan niingon nga sigi pa ug uwan sa bukid in fact naaymga landslide didto nga gipadagan nako sa atong mga heavy equipment pero dili ta kasiguro nga ma-dali kay kon sigi pa ning uwan mag lisod og agi.”
Samtang sa dakbayan sa Danao moabot sa 106 ka mga indibidwal o 24 ka mga pamilya ang apektado sa hitabo.
Sila nakabakwit og mga indibidwal sa mga tunghaan ug municipal covered courts.
Ang bugtong namatay sa siyudad giilang si Waren Jay Almaden, 27, taga Barangay Lawaan, bukirang dapit sa siyudad, kinsa napalgan sa Barangay Santa Rosa mga alas 3:24 sa hapon. Si Almaden gianod sa baha uban sa iyang motorsiklo.
Tungod niini, personal nga susihon ni Gobernador Gwendolyn Garcia ang mga lugar nga apektado sa baha ug hinungdan niini. Makig-alayon usab siya sa lokal nga kagamhanan ug sa Department of Public Works and Highways (DPHW) alang sa mga plano pag pugong sa baha. (ANV)