Pulis sa lungsod sa Asturias gipusil patay mga alas 9 sa buntag sa Huwebes, Disyembre 3, 2020 sa Purok Manga, Barangay Dumlog, Toledo City.
Ang biktima giila ni Lieutenant Colonel Junnel Guanzon Caadlawon, hepe sa Toledo Police Station, nga si Police Staff Sergeant Gerfil Geolina, 44, taga Barangay Das, sa dakbayan.
Si Caadlawon niingon nga sa ilang pasiunang imbestigasyon, ang mga residente sa dapit nakadungog lang og mga buto sa armas gikan sa national highway.
Sa ilang pagsusi, ilang nakaplagan si Geolina nga nagbuy-od sa karsada tupad sa iyang motorsiklo samtang ang riding in tandem nga mga mamumuno daling nanibat padulong sa Barangay Sangi.
Daling niresponde ang mga sakop sa City Disaster Risk Reduction and Management Office (CDRRMO), apan patay na si Geolina sa mga samad sa nagkadaiyang bahin sa iyang lawas.
Si Police Captain Gilfred Baroman, hepe sa Asturias Police, niingon nga si Geolina gikan ni duty sa police station ug padung na mopauli.
Ang iyang sakop nga nadestino sa alert team, iyang gihulagway nga buotan ug hilumon.
Pakigsultihan ni Baroman ang asawa ni Geolina kon w aba kini nakadawat og mga hulga. (GPL)