ANAA na sa 2,400 ang natalang kaso sa coronavirus disease (Covid-19) sa Cagayan de Oro human 20 ka mga residente ang nagpositibo sa reverse transcription-polymerase chain reaction (RT-PCR) test.
Sumala ni City Health Officer Dr. Lorraine Nery, sa 20 ka mga bag-ong lokal nga kaso, siyam ang mga close contacts sa mga pasyenteng nagpositibo sa coronavirus, tulo ang mga lokal nga authorized persons outside residence (Apors) ug walo ang mga local index cases.
Sa 2,400 nga kinatibuk-ang kaso sa Covid-19 sa syudad, 389 ang mga returning overseas Filipino workers/locally stranded individuals (ROFs/LSIs) ug 2,011 ang mga local transmissions.
Matud ni Nery, sa 2,011 nga mga local nga kaso, 155 ang mga persons deprived of liberty (PDLs), 1,025 ang mga local index cases, ug 831 ang mga local cases with link.
Ang Cagayan de Oro naay 453 ka mga active cases, 63 niini na-admit sa Northern Mindanao Medical Center (NMMC) ug uban pang mga ospital sa syudad, 377 ang mga outpatients, ug 13 ang mga ROFs/LSIs.
Nakatala usab og 37 ka mga Covid-positive nga mga kaso nga karon naka-recover human nagnegatibo ang resulta sa ilang repeat swab test. Anaa na karon sa 1,842 ang ihap sa mga nakarekober nga mga kaso sa dakbayan.
Sa maong numero, 274 ang mga LSIs, 101 ang mga ROFs, ug 1,487 ang mga lokal nga kaso (community: 1,204; Apors: 263).
Ang ihap sa mga namatay sa Covid-19 sa syudad naa sa 105.