Ang dakbayan sa Lapu-Lapu maoy ikaupat nga local government unit (LGU) nga nideklarar ilang adopted son si Police Brigadier General Albert Ignatius Ferro, bag-ong gihulipan nga direktor sa Police Regional Office (PRO) 7.
Una nang gideklarar nga adopted son si Ferro sa siyudad sa Sugbo, siyudad sa Talisay ug lungsod sa Dumanjug.
Si Ferro gitudlo nga acting chief sa Directorate for Information and Communication Technology Management (DICTM) sa Camp Crame.
Disyembre 1, 2020, gihulipan siya sa PRO 7 ni Police Brigadier General Ronnie Montejo, usa ka Talisaynon.
Sa wala pa nilarga sa kaulohan si Ferro aron mo-report na sa iyang bag-ong posisyon, gilibot niya ang mga city ug provincial police offices aron personal nga magpasalamat sa mga pulis nga misuporta sa iyang mga program sulod sa siyam ka buwan ug 25 ka adlaw sa pamunoan sa PRO-7.
Matod niya nga dili nila makab-ot ang ilang kalampusan sa pagbatok sa ilegal nga drugas ug sa coronavirus disease 2019 (Covid-19) tungod sa pagtibangay sa tanan.
Sa kasaysayan sa PNP sa Central Visayas, sila s Ferro ug Senator Ping Lacson lang.
Si Lacson gideklarar nga adopted son sa dihang aktibo pa kini sa PNP service diin nahimo kini hepe sa Cebu Metrodiscom niadtong dekada 90s.
Walay kabutangan sa kalipay ang gibati ni Ferro sa maong pasidungog nga matod niya nagpasabot lang kini nga pinangga siya sa mga Sugboanon.
Tungod niini, gitinguha niya nga diri sa Sugbo siya moretiro sa serbisyo sa tuig 2022.
“Actually I’m greatly humbled by the gesture of the local government of Cebu City and Talisay,” matod ni Ferro.
Dako og natampo si Ferro sa pagkunhod sa kaso sa Covid-19 sa Sugbo tungod sa iyang subsub nga contact tracing ug ang hugot nga pagpatuman sa minimum health standard.
Sa pagkakaron, mas niminos ang kaso sa Covid-19 sa rehiyon. / AYB