Usa ka pulis sa lungsod sa Asturias ang gibahigan-patay sa riding in tandem sa Purok Manga, Barangay Dumlog, dakbayan sa Toledo kagahapon, Disyembre 3, alas 9:00 sa buntag.
Si Lieutenant Colonel Junnel Guanzon Caadlawon, hepe sa Toledo Police Station, niila sa biktima nga si Police Staff Sergeant Gerfil Geolina, 44, ug molupyo sa Barangay Das, Toledo.
Si Caadlawon niingon nga ang mga residente sa dapit nakadungog og mga buto sa armas gikan sa national highway.
Sa ilang pagsusi, ilang nakaplagan si Geolina nga nagbuy-od sa karsada tupad sa iyang motorsiklo samtang ang mga mamumuno daling nanibat padulong sa Barangay Sangi.
Daling niresponde ang mga sakop sa City Disaster Risk Reduction and Management Office (CDRRMO), apan patay na si Geolina tiungod sa grabeng mga samad sa nagkadaiyang bahin sa lawas.
“Gikan man ni sa Asturias. Nag-duty ni siya gabii ni responde pa ni sa flooding incident. Nakig-alayon mi unsay mga impormasyon ug sa pamilya karon basin og naay death threats or unsa para nga maka sugod pud mi sa imbestigasyon,” matod ni Caadlawon.
Gikompirmar kini ni Police Captain Gilfred Baroman, hepe sa Asturias Police Station nga si Geolina gikan ni-duty sa police station.
Malipayon kaayo nianang gabii, hangtud na pagkabuntag si Geolina, butyag ni Baroman sa Superbalita Cebu.
“Komedyante man sab gud ni siya. Nagtapoktapok mi sa wala pa mo off. Wa mi magdahom nga pipila ka minutos pagbiya niini, nadawat nila tawag nga gi-ambusan,” dugang ni Baroma
Samtang, si Caadlawon niingon nga wala pa silay matumbok nga suspek atol ning pagkuha sa taho.
Adunay nakasaksi sa dapit nga gikuhaan na og pamahayag apan wala lang una ipahibawo ni Caadlawon aron dili mahadlok sa ilang kaugalingon.
Si Police Colonel Aladdin Colladom, direktor sa Cebu Provincial Police Office (CPPO), nimando sa kapulisan sa Toledo nga palawman pa ang imbestigasyon sa pagpatay ni Geolina.
Matod niya nga huwaton una niya ang kinatibok-ang resulta sa imbestigasyon dungan sa mando nga sulbaron sa labing dali nga panahon ang maong krimen ug pangitaon ang mga responsabli.
“Ang directives ko ay mabusising pag-imbestiga sa nangyari at it should be an air-tight investigation because the victim is one of our colleagues,” matod ni Collado. / GPL, AYB