Usa ka lalake nga nagmotorsiklo patay human girakrakan sa armas sa mamumuno nga nagsakay usab og motorsiklo sa Barangay Poblacion, Dakbayan sa Danao, alas 6:30 gabii.
Si Renieboy Cañete, 27, taga Brgy. Manguiao, lungsod sa Asturias, patay human nakaangkon og daghang samad pinusilan sa iyang lawas.
Wa pa mailhi sa kapulisan kon si kinsa ang nag-inusarang mamumuno nga nagsakay sab sa motorsiklo.
Si Police Staff Sgt. Fernando Gonzales sa Danao Police Station nga nahinabi sa Superbalita Cebu nagkanayon nga ang mga nakasaksi nibutyag nga padulong mosulod sa interior nga dalan sa maong dapit si Cañete sakay sa iyang motorsiklo.
Kalit lang mibutho ang laing motorsiklo diin ang nagdala niini namusil makadagang higayon.
Misibat ang mamumuno apan wa masuta sa mga nakasaksi sa hitabo kon asa nipadulong.
Matod ni Police Staff Sgt. Gonzales nga nagpadayon ang ilang imbestigasyon sa kaso lakip sa pagsuta sa anggulo sa pagpatay pinaagi sa pagsubay sa background ni Cañete. / GPL