Aron makatambong ang ilang mga lumolupyo sa siyam ka mga Misa de Gallo, ang mga lokal nga kagamhanan sa Dakbayan sa Sugbo ug Lapu-Lapu mopamubo sa mga oras sa ilang curfew.
Sila si Cebu City Mayor Edgardo Labella ug Lapu-Lapu City Mayor Junard Chan mopagawas og tagsa ka executive order alang niini.
Si Labella nagkanayon nga mopagawas siya og bag-ong executive order pag-amendar sa karaang EO sanglit sa kasamtangan, ang curfew nagsugod alas 11 sa gabii hangtod alas 5 sa buntag.
Sa umaabot nga EO, ang curfew magsugod sa alas 11 sa gabii hangtod alas 3 sa kadlawon aron mahatagan og kahigayonan nga makagawas sa ilang mga balay paingon sa simbahan ang mga tawo.
Ang mga misa magsugod sagad alas 4 sa kadlawon hangtod alas 6 sa buntag.
Gitun-an usab karon ang posibilidad nga makapahigayon og misa sugod sa Disyembre 15 hangtod 23 matag alas 5 sa hapon hangtod alas 9 sa gabii.
Sila si Labella, Konsehal Phillip Zafra, Joel Garganera, Cebu City Police Office , Cebu City Transportation Office ug kadagkuan sa simbahan nagtigom niadtong Lunes para hisgotan ang mga pamaagi sa Misa de Gallo aron maprotektahan ang mga tawo batok sa Covid-19. Ang mga misa ipahigayon lang sulod sa mga simbahan, di sa kapilya ug uban pang mga dapit.
USA KA ORAS
Atrasan og usa ka oras ni Chan ang curfew ordinance sa Dakbayan sa Lapu-Lapu aron mahatagan og kahigayunan ang mga Oponganon sa pagsimba sa mga Misa de Gallo.
Si Chan, sa interbyu sa Superbalita Cebu, niingon nga moisyu siya og temporaryong executive order nga maghimo sa curfew gikan sa alas 10 sa gabii ngadto sa alas 5 sa buntag ngadto na sa alas 10 sa gabii hangtod sa alas 4 sa kaadlawon.
Kay kadaghanan sa mga simbahan alas 4:30 ang pagpahigayon sa Misa de Gallo hinungdan nga iya kining himuon nga adjustment.
Ang kausaban sa ordinansa gikan sa Disyembre 16-24.
Matod sa mayor, iya usab nga gitugtan nga makagawas sa mga balay ang mga menor ug senior citizens basta motambong sa Misa de Gallo.
Ang simbahang Katoliko sa Pilipinas mao lang ang bugtong nasod nga gitugtan sa Vatican sa pagpahigayon sa Misa de Gallo. Kay karong panahuna, tugnaw sa mga nasod sa kasapan. / PAC, FVQ