Di na angay mabalaka ang publiko nga wa na silay masakyang bus kon lawom nang gabii.
Sunod semana, padaganon ang dugang 73 ka mga bus sa kadalanan sa dakbayan sa Sugbo sud sa 18 ka oras matag adlaw.
Kini ang gipahibawo ni Regional Director Eduardo Montealto Jr., sa Land Transportation Franchising and Regulatory Board (LTFRB) 7, kinsa kinsa niingon nga kini aron pagsiguro nga adunay masakyan ang mga nagtrabaho panahon sa lawom nang gabii.
Si Montealto nagkanayon nga ang 73 ka mga bus apil sa service contracting, usa ka programa sa DOTr.
Matag kilometro nga ilang mabiyahe, bayran sila sa kagamhanan og P23.10 kon ang pasahero dunay maayong feedback kaniya.
Ang mga driver makabenepisyo gumikan sa subsidy nga direktang ihatag ngadto kanila.
Sila sab ang tubag sa nagkuwang nga mga de pasaheroan labi na panahon sa peak hours sa dakbayan.
Ang 40 ka mga bus gikan sa MyBus company ug 33 gikan sa Vallacar Transit Inc (VTI).
Samtang gipadayag ni Montealto nga aduna pay sobra 30 ka mga driver ang VTI nga gikan sa Batangas. Sila nianhi sa Sugbo sanglit wa pa silay biyahe sa Southern Luzon.
Ang Ceres adunay 320 ka mga bus driver nga nagbiyahe sa south zdistrict ug 250 sa north district sa dakbayan sa Sugbo.
Matag bus sa VTI adunay duha ka drivers nga magpuli-puli sa pagbiyahe.
Matod ni Montealto nga naa silay reserve nga 30 ka drivers alang sa Cebu City.