NAGPAGAWAS og bag-ong ordinansa ang kagamhanang probinsiyal alang sa temporaryong pagsuspende sa naandan nga curfew hours atol sa mga mahinungdanong petsa sa pagsaulog sa kapaskohan.
Subay sa Memorandum Order Number 326-2020, gitakda sa Sangguniang Panlalawigan (SP) ang pagsibog sa curfew hours subay sa customary Catholic religious practice sa pagsaulog sa Pasko.
Sugod Disyembre 16 hangtod 24., kon diin dunay Misa de Gallo, gitakda ang curfew hours gikan alas 8 sa gabii hangtud alas 4 sa kaadlawon.
Sa Disyembre 24 nga mao ang Christmas vigil mass, gitakda ang curfew hours gikan alas 9 sa gabii hangtud alas 5 sa sayong kabuntagon ug susamang oras sab ang mahitabo sa Disyembre 31, diin mao ang pagsugat sa Bag-ong Tuig.
Gipasidan-an sab sa lokal nga gobyerno ang tanang Katolikong deboto ug mga simbahan sa probinsiya nga istriktong ipatuman ang mga minimum health protocols ug motamod sa Davao del Sur Contact Tracing System, subay sa SP Ordinance 20-60-2020.
Bisan pa og gi-adjust sa mga awtoridad ang curfew hours atol sa mga adlaw sa Pasko ug Bag-ong Tuig, daghan gihapon ang naminghoy gumikan kay gilantaw nga mingaw ang taliabot nga espesyal nga mga adlaw. (Orlando B. Dinoy)