DUHA ka lungsod sa Davao de Oro ang nasudlan na og African Swine Fever (ASF) subay sa natala sa opisyal Facebook page sa kagamhanang probinsiyal.
Mga lungsod mao ang Compostela ug Montevista.
Nasayran nga niadtong Nobyembre 28, 2020, gihimo ang pagpatay sa mga baboy nga nasulod sa infected area sa ASF didto sa Barangay Siocon sa Compostela.
Kini human nga nakompirma sa Department of Agriculture-Regional Field Office Davao Region pinaagi sa Regional Animal Disease Diagnostic Laboratory-Davao Region nga nagpositibo sa ASF ang blood sample sa mga baboy nga gipadala ngadto sa ilang buhatan gikan sa nahisgutang barangay.
Gilayong mihimo og aksiyon si Mayor Lema Bolo subay sa containment protocol sa ASF sa tinguha nga maseguro nga dili makagawas ang maong sakit sa mga binuhing baboy sa maong barangay ug dili sab kini mokatag sa kasikbit nga mga barangay.
Gilayon sab nga nagmuntar og checkpoint nga dunay wheel bath sa entry ug exit points sa Barangay Siocon aron maseguro nga ma-disinfect ang tanang sakyanan nga mosulod ug mogawas sa maong barangay.
Samtang niadtong Huwebes, Disyembre 3, 2020, gikompirma sab sa lokal nga panggamhanan sa Montevista nga natakdan na og ASF ang Barangay Linoan ubos sa pagdumala ni Kapitan Bonifacio Calamongay.
Daling miabiso ang lokal nga panggamhanan, ubos ni Mayor Eutropio Jayectin, ngadto sa mga molupyo nga dunay mga binuhing baboy nga nasulod sa 500 meter radius gikan sa infected area nga moduol sa opisina sa Municipal Agriculture Office alang sa lihitimong lakang sa pagseguro nga dili mokuyanap ang ASF sa mga kasikbit nga mga dapit o barangay. (Dexter T. Visitacion)