DUGANG onse ka mga bag-ong kaso sa coronavirus disease 2019 (Covid-19) ang natala sa Cagayan de Oro human nagpositibo sa Sars-CoV-2 ang usa ka returning overseas Filipino worker (ROF) ug 10 ka mga local cases.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 2,411.
Sumala ni City Health Officer Dr. Lorraine Nery, sa 10 ka mga bag-ong lokal nga kaso, lima ang mga close contacts sa mga pasyenteng nagpositibo sa coronavirus, usa ang lokal nga authorized person outside residence (Apor) ug tulo ang mga local index cases.
Sa 2,411 nga kinatibuk-ang kaso sa Covid-19 sa syudad, 390 ang mga returning overseas Filipino workers/locally stranded individuals (ROFs/LSIs) ug 2,021 ang mga local transmissions.
Matud ni Nery, sa 2,021 nga mga local nga kaso, 155 ang mga persons deprived of liberty (PDLs), 1,030 ang mga local index cases, ug 836 ang mga local cases with link.
Ang Cagayan de Oro naay 438 ka mga active cases, 65 niini na-admit sa Northern Mindanao Medical Center (NMMC) ug uban pang mga ospital sa syudad, 363 ang mga outpatients, ug 10 ang mga ROFs/LSIs.
Nakatala usab og 25 ka mga Covid-positive nga mga kaso nga karon naka-recover human nagnegatibo ang resulta sa ilang repeat swab test. Anaa na karon sa 1,867 ang ihap sa mga nakarekober nga mga kaso sa dakbayan.
Sa maong numero, 278 ang mga LSIs, 101 ang mga ROFs, ug 1,488 ang mga lokal nga kaso (community: 1,224; Apors: 264).
Ang ihap sa mga namatay sa Covid-19 sa syudad naa sa 106.