Daw nakadaog og kampiyunato sa National Basketball Association (NBA) si Miami Heat star Jimmy Butler sa iyang pag-date sa sexy ug maanyag nga Hollywood actress Selena Gomez.
Ang 28-anyos nga pop star nga si Gomez maoy ex-girlfriend sa sikat nga singers nga si Justin Bieber ug Abel Makkonen Tesfaye nga nailhan sa iyang stage name nga The Weeknd.
Nagsugod ang hugonhugon kabahin sa relasyon ni Gomez ug Butler dihang nakit-an ang duha nga nagkuyog sa usa ka romatic dinner New York City, USA.
Si Butler bag-uhay lang migiya sa Heat ngadto sa NBA Finals 2020 sa Orlando bubble. Napilde man tuod ang Heat sa powerhouse nga Los Angeles Lakers alang sa kampiyunato apan nakakuha kini og dako nga respeto sa mga basketball fans.
Ang Heat wala damha nga maabot sa NBA Finals apan tungod sa grabe nga gibuhat ni Butler, naalsa niya ang maong team.
Pipila lang ka mga buwan human sa NBA Finals, si Gomez na sab ang gustong makab-ot ni Butler.
Sigon sa taho sa E! News nga nagka-date na si Gomez ug Butler sa makadaghang higayon. Nagsugod kini sa pag-imbitar ni Butler kang Gomez sa usa ka panihapon.
Sa post sa Clutch Basketball kagahapon, nakit-an si Butler ug Gomez nga nag-romantic dinner ug mipadulong sa usa ka hotel human niini.
Daghan ang mibilib kang Butler tungod sa iyang pag-date kang Gomez.
Si netizen Clark Leo Marquez miingon nga ang pag-date ni Butler kang Gomez sama na sa midaog siya sa iyang unang championship ring. Dugang ni WJ Akoijam nga si Butler mipasulod og three-point shot di lang sulod sa court apan lakip na sa gawas.
Si Butler na-draft sa Chicago Bulls niadtong 2011 ug miduwa alang sa franchise hangtod tuig 2017. Na-trade siya ngadto sa Minnesota Timberwolves sa 2017 season. Miduwa pud siya sa Philadelphia 76ers sa tuig 2018 ngadto 2019.
Ang iyang uwahing team mao ang Heat sa 2020 season.
Sa playoffs sa NBA 2019-20 season, si Butler nag-average og 22.8 points, 6.5 rebounds, 6.0 assists lakip na ang triple doubles sa NBA Finals sa Games 3 ug 5.
Si Gomez usa ka singer, songwriter, aktres ug producer.