Nahimo nang miyembro sa Philippine Coast Guard Auxiliary (PCGA) ang Sugbuanong runner nga si Mary Joy Tabal human siya gi-induct isip Lieutenant Commander niadtong Disyembre 3, 2020 sa Cebu Parklane International Hotel.
Ang PCGA usa ka service-oriented, uniformed, voluntary nga organisasyon.
Sigon sa Southeast Asian (SEA) Games 2017 gold medalist nga nagdako siya nga nag-idolo sa men in uniform kay ang iyang amahan nga si anhing Ronaldo usa man ka miyembro sa Philippine Constabulary ug Philippine National Police.
Human sa iyang induction, nanghinaot si Tabal nga mahimo nang hingpit nga miyembro sa Philippine Coast Guard (PCG).
“PCG is opening its door to enlist me once mag open na sila next year, for now will serve as an officer in PCGA,” batbat sa 31-anyos nga si Tabal.
Si PCGA Commander Chester Sumalinog maoy nag-induct kang Tabal isip highest-ranked Auxiliarist sa ilang batch.
Ang unang tahas ni Tabal mao ang pagsalmot sa Coastal Clean Up Drive karong adlawa sa Cordova, Cebu.
Matod ni Tabal sa iyang induction speech nga dako iyang respeto sa mga tawo nga misakripisyo sa ilang kaugalingon ug oras alang sa atong nasod.
Dugang niya nga ang maong tahas usa ka bag-ong hagit kaniya isip produktibo nga miyembro sa komunidad. Gusto niya nga mahimong role model sa mga batan-on labi na sa mga babaye.
Si Tabal usa sa mga sikat nga runners sa iyang henerasyon. Lakip sa iyang mga dako nga daog mao ang 2017 SEA Games gold medal, 2019 SEA Games silver medal, unom ka Milo Marathon title ug iyang pagsalmot sa 2016 Rio Olympics.