Sa wala pa ang lockdown niadtong Marso ning tuiga, usa ko sa aktibong nagplano unsay pinaka nindot ug halandumon nga reunion alang sa among batch sa high school nga mapahigayon ning panahon sa Pasko.
Hilabihan unta ni ka tulokibon nga reunion kay sukad sa among pagpaso sa 4th year high school niadtong tuig 1979, kini pay unang higayon nga magkatapok ang among batch.
Kuwarenta ka tuig na ang nakalabay. Pwerteng dugaya na. Diha nay daghang homecoming nga nahitabo nga gitambongan sa mga gradwado gikan sa nagkadaiyang tuig. Pero ang reunion para sa among Batch 78-79, karong bulana unta mahitabo sa labing unang higayon. Tungod kay layo kaayo ang among eskwelahan sa high school nga mao ang among pinangga nga Lourdes Academy sa San Miguel, Zamboanga del Sur, wala gyud mahatagi og katumanan kaniadto ang daghang plano.
Tungod kay nitungtung na sa 40 ka tuig sukad nga kami nigradwar, naninuod ang organizer pagpaabot kutob sa mahimo sa among mga classmate. Gamit ang social media, nibuto kining maong plano pinaagi sa among classmate, ang athletic sa matag Founder’s Day nga si Nilda Rivera. Bisan sa kalayo sa iyang nahimutangan isip OFW sa Kuwait, walay puas ang iyang pagpadala og mensahe sa FB nga magdasig sa tanan nga magkatapok. Dili lisod sa pipila nga tua ra sa duol sa eskwelahan nagtrabaho ug nanimuyo. Di gihapon lisod bisan sa mga nagtrabaho sa nagkadaiyang suok sa Pilipinas sama nako ug sa mga OFW, kay taudtaud naman gipangandaman. Pero nianang pagsugod pagpanghasi sa coronavirus, nahugno ang among paglaum. Guol kaayo basahon ang mga mensahe sa group chat kay ang unod managsama ra. Ang kaguol, kahigwaos, kabalaka ug labaw sa tanan ang pagkapapas sa paglaum nga ang dugay na nga gidamgo nga batch reunion napagan tungod sa pandemya.
“Mga tigulang na baya ta, kinahanglan nga magkitaay pud ta uy.” mensahe ni classmate Tessie Abarquez. Mao ni mensahe nga kanunayng mamukaw nako niadtong wala pay pandemya. Si Henry Paña, among class valedictorian, naka connect na ra ba unta bisan sa kalayo sa iyang nahimutangan. Gawas nako, Tessie ug Nilda sila si Doming Quilo, Lourdes Andales, Virgie Banaag, Lalaine Vidad, Filmor Chavez, Roger Perida, Arding Rodriguez Salabit, Edith Bonilla Din ug mga OFW sama nila ni Chief Arthur Tillo sa Ireland ug Fely dela Peña sa Canada, pipila lang ni sila nga apil sa grupo pag-andam sa reunion nga gitawag nako og Tapok tapok 2020. Unsaon ang hulga sa Covid-19 nagpadayon sa pagpig-ot sa kanhi sayon ug luwas nga biyahe. Mao nga padayon ang pag-ampo nga unta matapos na ning tanang mga pag-antos ug itugot sa Labawng Makagagahum nga dili lang ang among reunion apil na sa uban nga nagplano ang mahatagan og katumanan.