Og wa masakit akong higala nga si Anne (tinuod ngalan gitago), wa sab ko maghikutar ug magsusi sa impostansiya sa kolor sa ihi. Kaniadto nagtuo ko nga tanang ihi parehas ra way kolor (transparent).
Matod ni Dr. Bilal Kaaki sa Unity Point Health, Kining ihi makasulti sa estado ug kahimtang sa lawas. Mahimo kining lasaw nga dilaw (yellow) o maypagka pula-pula, pink, orange o green. Ang atong gipangkaon, mga tambal nga gi pang-inum o gipamating sakit -sakit sa lawas makapa-usab sa kolor sa ihi.
Kon himsog ang tagtungod ang normal nga kolor sa ihi medyo maypagka lasaw nga dilaw (pale yellow). Kon lugom o espiso na gali ang pagka dilaw, pasabot nga dehydrated ang lawas. Kining pigment nga gitawag og urochrome o urobilin maoy maka-ingon sa yellow nga kolor.
Puno ni Dr. Kaaki, kining mosunod maoy pasabot sa kolor sa ihi:
Light Brown nga ihi (murag kolor sa tsa). Pasabot nga posibling naay problema sa kidney. Ang subra sab nga pag-ehersisyo pananglitan tumang pagdagan, mao say maka-ingon sa kondisyon nga rhabdomyolysis nga maoy mopagawas sa kolor nga light brown.
Pula o pink nga ihi. Kining pula nga mga pagkaon sama sa beries, beets usahay bisag hipon nga daghang pink koloring maoy maka papula o pink sa ihi. Apan kon duyugan kini og sakit-sakit sa pagpangihi, duol gilayon sa mananambal kay posibling urinary tract infection, bato sa kidney (kidney stones) o cancer.
Asul (blue) o berde (green) nga ihi. Kasagarang makapa-usab sa kolor nga ingon ini ang food coloring apan ang Bitamina B makapa-green sab sa kolor sa ihi. Ang tambal sa depression sama sa amitriptyline, propofol (anesthesia kung operahan) og indomethacin (pain reliver) makapa-asul o berde sab sa kolor sa ihi.
Orange nga ihi. Ang Bitamina C ug carotene sa carrots makapa-orange sab sa ihi apil ang antibioltics nga tambal para sa tuberculosis nga gitawag og Rifampicin. Angay bantayan kining kolora kay signos sab kini nga dunay depression o sakit sa atay.