Sa miaging semana, nipahibawo si Department of the Interior and Local Government (DILG) Secretary Eduardo Año nga mahimo nang mosulod sa mga mall ang mga menor nga 15 anyos paubos basta kuyog sa ilang mga ginikanan.
Sa gihapon, ang mga local government unit (LGU) maoy makabuot o dunay katapusang hukom, pinaagi usab sa pagpasar og ordinansa alang niini.
Si Cebu City Mayor Edgardo Labella supak kay kuyaw kini nga lakang sa pagkuyanap og balik sa coronavirus disease (Covid-19). Gitumbok usab ni Labella ang pagsupak sa Department of Health pinaagi ni Secretary Francisco Duque III.
Tinuod, ang pagpabalik sa mga menor sa gawas, labina sa mga mall, dako og ikatabang sa ekonomiya nga nagusbat og maayo tungod sa mga restriction. Apan kon ipamugos ang pagpagawas kanila, magbutang kini sa kakuyaw sa pagsulbong og balik sa mga kaso.
Dunay international nga mga pagtuon nga nagpakita nga ang mao nga mga edad nagdala sa virus, apan kadaghanan wa magpakita og mga simtomas. Nagpadayon sila sa paggawas hinungdan nga sila nakapanakod og maayo sa mas daghang mga tawo.
Human sa pagpailawom sa Sugbo sa modified general community quarantine, ingon sa mibalik na sa normal ang sitwasyon. Maghuot na gani ang trapiko kada adlaw. Apan kining tanan mahimong mapapas kon mosaka og balik ang mga kaso sa Covid.
Bisan kon ubanan sa mga ginikanan ang kabataan, di maseguro nga sila mosunod o magbantay kanunay sa pagsunod sa mga health protocol kon naa na sulod sa malls. Ang mao nga mga edad sagad di magbantay, luhag ug uban pa tungod kay linghod pa og panimuot.
Igo nang makagawas sila kon moadto og tourist spots, apan ang pagtugot kanila sa pagpasulod sa mga mall tinuod dakong risgo. Kay kon mosakag balik ang mga kaso, mobalik na usab sa uno. Kadakong usik no?