Gipanglantawan nga molapas pa sa P55 milyones ang natala nga danyos sa lungsod sa Tuburan nga maoy nagrabehan sa baha nga nilunop niadtong Miyerkules, Disyembre 2.
Kini maoy gibutyag ni Richard Hernandez , pangu sa Municipal Disaster Risk Reduction and Management Office (MDRRMO) atol sa pakighinabi sa mga tigbalita sa Disyembre 4 sa Barangay Molobolo, lungsod sa Tuburan.
Sa datos, P40 milyones ang nadaot sa mga imprastraktura sama sa flood control infrastructure, kabalayan ug eskwelahan.
Samtang P15 milyones ang nadaot sa agrikultura sama sa kasagingan, maisan, humayan ug uban pa nga mga lagutmon lakip na ang mga kahayopan.
Matod ni Hernandez nga ang pagsaka sa lebel sa tubig sa lungsod maoy unang higayon nga nasinati sa mga residente.
Apan gipahibaw ni Neil Sanchez, pangu sa Provincial Disaster Risk Reduction and Management Office (PDRRMO) nga ila usab susihon ang giingong buhawi sa boundary sa dakbayan sa Danao ug Tuburan.
Subay sa datos nga nakuha sa MDRRMO sa Disyembre 3, niabot na sa 20 ka mga barangay gikan sa kinatibuk-an nga 54 ang apektado sa baha.
MISUSI
Si Cebu Gobernador Gwendolyn Garcia misusi sa mga lungsod nga nakasinati sa grabeng baha.
Una nga giduaw ang lungsod sa Balamban diin nalakip sa pagsusi ang Balamban River, Guinabasan River sa Asturias ug Languyon river sa Tuburan.
Isip diha-diha nga solution mopahigayon og dredging sa kasapaan aron didto na mosubay ang tubig, dili na mosuyla.
Aron nga ma-finalize kini, makigtagbo si Garcia sa mga sakop Provincial Environment and Natural Resources Office (PENRO), Provincial Engineering Office (PEO), Provincial Disaster Risk Reduction and Management Office (PDRRMO) ug ang sakop sa Department of Public Works and Highways (DPWH) ug uban pa nga importanteng ahensya nga makatabang sa plano sa Disyembre 9. /