Ang Archdiocese sa Sugbo uyon sa sugyot ni Cebu City Mayor Edgardo Labella nga dunganon ang pagpahigayon sa mga Misa de Gallo sa mga simbahan sa dakbayan.
Ila usab nga gikonsiderar ang sugyot sa mga parokya nga kaduhaon ang mga misa aron di magpunsisok ang mga manambong ug mapatuman ang social distancing.
Matod ni Fr. Japheth Geonzon, vice chairman sa Commission on Worship sa Archdiocese, sa interview sa Biyernes, Disyembre 4, 2020, si Cebu Archbishop Jose Palma mopatawag pa og tigom tali sa kaparian sa mga parokya sa siyudad samtang naghuwat pa sa hukom ni Labella.
Nipahibawo na si Labella nga iyang iisbog ang curfew sa siyudad, gikan sa alas 11 sa gabii hangtod sa alas 5 sa buntag ngadto na sa alas 11 sa gabii hangtod sa alas 3 sa kaadlawon.
Usa ka executive order ang iyang luwatan nga gipaabot nga mogawas sa Lunes, Disyembre 7.
Iya kining gitumong aron ang simbahang Katoliko makapahigayon sa Misa de Gallo.
Hangtod nga makaluwat si Labella og EO, ang simbahan di pa makahimo lakang.
Si Geonzon niingon nga ang sugyot ni Labella nga dungan ang pagtakda sa Misa de Gallo aron malikayan nga magtaboktabok ang mga parokyano sa laing parokya usa ka “a good suggestion.”
Siya niingon nga ang pagpahigayon og duha ka mga Misa de Gallo, ang mga manambong mabahin busa mas sayon nga ipatuman ang mga health protocol sulod sa simbahan.
MANDAUE LAHI
Gikompirmar ni Archdiocese of Cebu Auxiliary Bishop Midyphil Billones nga magpahigayon og Misa de Gallo ang walo ka mga parokya sa dakbayan sa Mandaue sugod sa Disyembre 16, 2020.
Gilaraw sab nila nga magbutang og satellite areas sa misa aron di magpunsisok ang mga tawo sa mga parokya.
Nagtagbo alang sa inisyal nga plano silang Billones, kauban si Mandaue City Mayor Jonas Cortes; Atty. John Eddu Ibanez, executive secretary ni Cortes; Atty. August Lizer Malate, pangu sa Emergency
Operations Office; Police Colonel Jonathan Abella, city director sa Mandaue City Police Office.
“Misa de gallo because it is culturally part of our heritage as Cebuanos ug essential siya sa atong life especially kining dawn masses,” sigon ni Billones.
Matod ni Billones nga misuporta ang lokal nga kagamhanan sa dakbayan sa Mandaue nga idayon ang Misa de Gallo.
Giklaro sab ni Billones nga padayon gihapong ipatuman ang mga health protocol, maoy kanunay ipahinumdom ni Palma.
Wa pa silay nakab-ot nga hukom sa pagmisa kay magdepende na kini sa walo ka parokya sa Mandaue City.
Apan, gihisgotan sab nila nga isip respeto sa curfew, magsugod ang Misa de Gallo alas 4 ngadto sa alas 4:30 sa kaadlawon.
Sa laing pakighinabi, si Mayor Cortes niingon nga si Billones makigtagbo pa sa mga parokya sa Mandaue, kon aduna ba silay satellite areas nga lapad alang misa, sama sa mga barangay gym.
Matod ni Cortes nga ipagamit niya ang espasyo sa Mandaue City Plaza diin gamiton sab ang LED monitor aron makatambong ang mga lumulupyo bisan sa gawas sa simbahan sa National Shrine of Saint Joseph.
Dili sab pa-parkingan ni Cortes aron dako ang espasyo ug matuman ang social distancing.