Migallen: Kontra ni Pagara ihawonon

Migallen: Kontra ni Pagara ihawonon

Tangkod dose ka adlaw gikan karon, sa unang higayon ubos sa iyang bag-ong promoter mopakita na og aksiyon si Prince Albert Pagara.

Ning higayona, isip magsilbing tuneup fight sa iyang pagbalik og saka sa ring, iyang ikasangka si Virgil Poton sa ikaduhang boxing presentations sa Omega Boxing Promotions taliwala ning nagpadayon nga pandemya.

Kini maoy unang away ni Pagara, (32-1-0) human mosira ang Ala Boxing Gym, ang boxing stable nga maoy iyang namat-an sukad nisulod siya sa pagka professional fighter.

Sanglit kay usa ra man ka tuneup fight, langkuban lang sa walo ka round ang ilang sinukliay sa kumo ug kini ubos sa timbang nga 130 lbs. nga dili mao fighting weight ni Pagara.

Si Pagara gidumala na karon sa usa ka international boxing outfit nga mao ang MTK Global ug D4G Promotions, usa ka dakong boxing stable sa tibuok kalibutan nga mao usab ang naghupot sa pipila ka mga tang-ang, inila ug mga world champions.

Gani, sa tanang sakop niini, sila lang ni Donnie Nietes, ang four-division champion, ang mga Filipino fighters nga anaa sa maong stable.

Masabot nga dili madalidali nga magpasakop ug pinili lang nga mga boksidor ang kuhaon ning maong stable. So, ang pressure anaa karon ni Pagara ug kinahanglan impresibo ang iyang ilihi ngadto sa MTK Promotions.

Lisod baya ning makuptan ka og dagkong promotion kay kon dili ka makapakita og maayong performance dali ra ka nilang ipadaplin ug posibling dili hatagan og maayong pagtratar.

Tune up fight man tuod kini alang kaniya apan sa gikaingon ko na kinahanglan pabilibon gyud niya ang MTK Promotions.

Pero yuna ra, duna ba kahay challenge si Pagara niining Poton kon mahinayon man gani nga mao ni iyang makontra? Sa iyang kalidad nga naila nga knockout artist ug gihulagway nga usa sa adunay kapabilidad nga ma world champion, gisakbang siya og boxer nga adunay record nga 18 ka daog, 14 ang pildi ug duha ang tabla.

Ambot og asa nga departamento nga nakabentaha si Poton ni Pagara.

Wa man tuod mosaad si Pagara og knockout nga kadaugan kay kapin sa tuig lagi nga wala siya ka away. Pero kon di kini niya ma-knockout posibli hayan matibhangan ang pagsalig sa iyang bag-ong promoter ug sa gikaingon ko na sa unahan nga tingali og mausab ang ilang pagtan-aw ug pagtratar kaniya. Mosamot kon simbako mataghapan ug mapildi siya.

Katapusang nakaaway si Pagara niadto pang Agusto sa niaging tuig diin iyang gi knockout si Ratchanon Sawangsoda sulod sa usa ka round didto sa Ormoc City. So, usa na ka tuig nga wa siya makaaway ug tungod sa pag-ataki sa coronavirus disease sa tibuok kalibutan naputol ang tanang kalihukan sa boxing.

Si Poton, sa iyang bahin, nakaaway niadtong Disyembre 2019 didto sa Kaulohan diin siya gi knockout sa Sugboanong si Dave Penalosa sulod lang sa usa ka round.

Actually, dili komportable si Pagara sa 130 lbs. Gusto niya nga anha lang permi sa 122 lbs. ang iyang timbang nga awayan.

Ang bugtgong niyang kapildihan iyang naangkon sa dihang na knockout siya sa Mexicanong si Cesar Juarez sa walo ka round didto sa Estados Unidos niadtong Hulyo 16, 2016.

Apan human niadto, mipupo siya og unom ka sunodsunod nga kadaugan diin lima niini iyang gipang knockout.

Sa kasamtangan, si Pagara anaa mag ensayo sa Gladiator Boxing Gym sa Talamban. Iyang giangkon nga sa pagkakaron moabot pa og 140 lbs. ang iyang timbang apan masaligon nga makuha ra gihapon niya ang 130 lbs. atol sa tinimbangay.

Nagpanikad na si Pagara sa iyang umaabot nga away apan anaa ra kaniya kon unsaon niya pagpa impressed ang iyang bag-ong boss ilabi na kay kining iyang kontra, sa akong tan-aw, ihawonon ra ba. Goodluck, Prince. (jun.migallen22@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph