NAA pa bay MMFF karong tuiga? Disyembre na ug hapit tanang mahilig sa sine pa-abuton gyud ang mga opisyal nga pelikula sa matag tuig nga MMFF.
Hangtud karon wala pa may abli ang mga sinehan, mao ni ang usa sa mga dakong naapektuhan sa pandemiya.
Mao nga siguradong ma-miss nato nga makita sa dakong puting telon silang Coco Martin, Vic Sotto, Ai-ai de Las Alas, Vice Ganda ug uban pang mga sikat nga artista nga kasagaran na natong makita matag Pasko.
Pero sa nasagap nato nga impormasyon bisan pa man ining Covid 19 madayon gihapon ang MMFF 2020.
Sa mga naghulat niini inyong masugdan og tan-aw ang mga opisyal nga pelikulang mosalmot niini karong Pasko.
Mahimo ninyo kining makita sa inyong mga panimalay kay wala pay mga sinehan mao nga karong tuiga sa online ninyo makita ang tanang mga pelikula.
Ato lang unyang hisgutan kon unsa mga pelikula ang opisyal nga nakasulod sa MMFF 2020, ay’g saba!
STATION ID
Daghang mga reaksyon ang atong nadunggan ug nabasahan sa dihang gipagawas na ang ABS-CBN Christmas station ID nga “Ikaw ang liwanag at ligaya”.
Bag-ohay pa lang kining gipagawas online apan gawas nahimo kining trending, viral ug minilyon na ang views niini.
Siguro sa mga followers sa Kapamilya channel nagmaya ug malipayon kini kay bisan pa man og nakuhaan ni og prankisa, nakita gihapon nila ang Christmas station ID nga ilang gipaabot pirme matag tuig.
Ang usa pod sa akong gitan-aw dinhi, kon kinsang mga artista ang wala nato makita.
Sama nilang Piolo Pascual, Billy Crawford, Jericho Rosales, Bea Alonzo, John Lloyd Cruz ug uban pa.
Apan kompleto gihapon sa mga banggiitang singers, mga nag-unang loveteams ug mga loyalistang Kapamilya ang maong Christmas ID.
Daghan usab ang nadutlan sa lyrics sa ilang kanta, maong happy ang mga kapamilya, ay’g saba!
KONTROBERSIYAL
“Owe My Love” ang bag-ong proyekto sa GMA network nga nag-lock in taping ug nahimong kontrobersyal.
Unsaon nakita man gud nato ang Mystica diin nagyawyaw sa online sa iyang mga daghang reklamo sa staff ug kaubang artista.
Apan kini tanan gipanghimakak sa maong produksyon ug wala na lang sab siya tubaye ni Kiray Celis.
Ang resulta gitangtang na sa cast ang Mystika, pero dili na usab kita mahibulong niini kay may nahitabo naman usab nga susama niini kaniadto.
Ang resulta nawagtangan na usab ug raket ang singer actress, ay’g saba!