PASKO ang gipangandaman sa paghulat sa Adbiyento. Sa kinaiyahan ug sa kinabuhi sa tawo, ang mga yugto nga mahinungdanon kaayo nanginahanglan og paghulat nga mapailubon. Ang pailob makab-ot lamang diha sa paghulat. Ug ang paghulat nanghinahanglan og pailob.
Walay hisgot sa Pasko sa Pagkatawo ni Jesus diha sa ebanghelyo ni Marcos. Midiritso dayon siya sa ebanghelyo kon “maayong balita”. Bus-ok kaayo ang sinugdanan ni Marcos: “Ang sinugdanan sa maayong balita ni Jesucristo [ang Anak sa Dios]”. Mao kini ang maayong balita nga gisangyaw sa mga apostol mahitungod kang Jesus, mahitungod sa iyang kinabuhi, sa iyang gisangyaw ug gibuhat.
Ang ikaduhang bahin sa maong ebanghelyo naghisgot kang Juan Bautista, sa iyang gisangyaw ug misyon: “Ania gipadala ko ang akong anghel unya kanimo; nga moandam sa imong agianan. Usa ka tingog nga nagasinggit didto sa kamingawan, ‘Andama ninyo ang agianan sa Ginoo, himoang tul-id ang iyang mga agianan’”. Anghel kun mensahero ang papel ni Juan. Pinaagi sa iyang pulong ipatul-id niya ang agianan padulong kang Jesus diha sa pagbag-o sa mga hunahuna sa mga tawo aron mohatag sila og luna sa Mesiyas ug makadawat sa iyang mga bendisyon. Nag-una si Juan kang Jesus ug siya ang magpatul-id sa mga hiwi nga panghunahuna sa tawo nga dili buot modawat sa kabubut-on sa Dios kay mipatigbabaw ang ilang kaugalingon.
Gitagna na ni propeta Isaias ang maong pagpangandam sa mga gasa nga ihatag sa Dios. Moabot ang mga panahon kanus-a luwason sa Ginoo ang Israel. Gilarawan ni Isaias ang pagpabalik sa Ginoo sa mga Israelita gikan sa Babilonya ngadto sa Jerusalem: “Abunoi ang tanang walog; pataga ang tanang bukid. Ang kabungtoran mahimong patag, ug ang dapit nga gansalgansalon mahimong hapsay”. Dili madalidali ang pagpatag sa kabungtoran. Apan walay imposible sa Ginoo.
Sa laing bahin, “sa Ginoo ang usa ka adlaw ingon sa usa ka libo ka tuig ug ang usa ka libo ka tuig ingon lamang sa usa ka adlaw. Ang Ginoo dili maglangan pagtuman sa iyang gisaad sumala sa gihunahuna sa uban”. Dili gyod kawang lamang ang paghulat. Ang Ginoo “nagpailob kaninyo, kay dili siya buot nga may usa nga malaglag, kondili ang tanan maghinulsol ug mobiya sa ilang mga sala”.
Kumusta man ang atong paghulat sa panahon sa Adbiyento?