Nakuratan ko dihang nakadungog sa balita nga ang Megawide-GMR Cebu Airport Corp. (GMCAC) giimbestigar sa National Bureau of Investigation (NBI) ug ipa-indict niini diha sa korte.
Matod pa, nakalapas ang mga opisyal niini sa anti-dummy law.
Unsaon nga mga langyaw nga kontraktor mao na may nagdumala karon sa Mactan-Cebu International Airport Authority (MCIAA). Nakahibawo kaayo ang mga taga Sugbo niini.
Matod pa sa reklamo sa NBI, ang airport karon gidumala sa usa ka Irish, usa ka Ghanaian, ug pipila ka mga Indians. Basi sa ilang nakuhang ebidensya, gikiha sa NBI silang MCIAA General Manager and CEO Steve Dicdican, GMCAC executives Manuel Louie Ferrer, Edgar Saavedra, Oliver Tan ug JZ dela Cruz.
Apil sab sa gikiha silang GMCAC foreign executives Srivinas Bommidala, P. Sripathy, Vivek Singhai, Andrew Acquaah-Harrison, Ravi Bhatnagar, Ravishankar Saravu, Michael Lenane, Sudarshan MD, Kumar Gaurav, Magesh Nambiar, ug Rajesh Madan.
Matod pa ni Distor, kini sila, nakalapas sa Commonwealth Act No. 108 o ang antidummy law ug sa 1987 Constitution. Dunay lain nga reklamo batok kang Dicdican diha sa Office of the Ombudsman.
Abi lang gyud tingale sa mga taga Cebu nga okay ra. Total, mga kaalyado man sa administrasyon ang naa sa MCIAA. Mga suportado man kini sa Office of the Presidential Assistant for the Visayas (OPAV).
Gani, di man diay subay sa atong balaod ang gibuhat sa Megawide. Ambot kon unsay kalabotan sab sa pagkawalay gahum sa OPAV dinhi sa Sugbo.
Tungod niini, na-intriga ang media sa Manila nga di ba kaha maapektuhan ang Build-Build-Build project diha sa Ninoy Aquino International Airport (NAIA).
Hmmm. Lain ang nakapa-intriga nako. Di ba kaha maapektuhan ang proyekto sa Megawide nga paninduton ang Carbon market.
Wa pa kaayo ko masuweto unsaon pagpakanaog sa maong proyekto. Basin og mga Pinoy na ang mga opisyal ug dili ang mga foreign contractor.
Bisan pa man, nasiguro ko nga nalipay karon ang kadagkuan sa kooperatiba sa mga Garcia nga mao ang CFI Community Cooperative. Gusto man usab kin inga mag-kontraktor sa Carbon market.
Mayor
Unsa ka tinuod nga kining pag-apil ni Winston Garcia sa CFI coop diha sa proyekto sa Carbon market tipik lang daw sa mas dakong tinguha nga modagan sa pagka mayor karong 2022?
Ingon ini ang analysis, nahuyang man gud si Mayor Edgar Labella tungod sa mga kapalpakan sa iyang anti-Covid response. Dayon, nawala pa gyud si OPAV dinhi sa Sugbo. Mao nga moguwa nga daw sayon ra nga modaog sa syudad sa Sugbo.
Total, wa may klarong kontra si Gob. Gwen Garcia sa lalawigan. So pwede ra sudlan ang siyudad. (@anol_cebu sa Twitter)