ANG Konseho sa Dakbayan sa Sugbo nipadaplin sa gahin nga P40 milyunes alang unta sa pagkaon sa mga frontliner, labina sa mga pulis nga naa sa mga checkpoint. Ang mga pulis pagahatdan og pinutos nga mga pagkaon kon nag-duty sa mga checkpoint.
Gimontar ang mga border control checkpoint sa nagkadaiyang mga dapit sa dakbayan sa Sugbo sukad sa paghugpa sa coronavirus disease (Covid-19). Mas gipahugtan pa kini dihang nisulbong og kalit ang mga kaso sa Covid-19 sa Hunyo ug Hulyo.
Bisan miminos na ang mga kaso, hugot gihapon ang pagsusi sa mga pulis nga nagdumala sa checkpoints sa mga tawo nga mosulod sa dakbayan sa Sugbo. Sila mga frontliner sa pagpugong nga di na masubli pa ang nahitabo niadtong Hulyo.
Kay naa pa man ang hulga sa Covid, si Konsehal Raymond Garcia miduso sa P40 milyunes nga budget alang sa pagkaon sa frontliners. Apan kay gipadaplin man, posibleng makaapekto kini sa mga border control sa siyudad. Kay matod ni Police Colonel Josefino Ligan, direktor sa kapulisan sa dakbayan sa Sugbo, dako og epekto kon tangtangan og meal allowance ang kapulisan sa frontline.
Matod ni Ligan nga mapugos sila nga kuhaan ang gidaghanon sa mga pulis nga magdumala. Ikaduha, mapugos usab sa pagbiya sa ilang pwesto ang mga pulis aron mamalit og pagkaon.
Wa pa may kahayag nga nakita nga mahanaw ang hulga sa Covid sa Sugbo. Samtang naa pa, mas maayo nga kanunay andam ang Siyudad sa bisan unsay mahitabo. Pananglitan simbako, mosaka na sab og balik ang mga kaso sa Covid, anha pa diay mohimog lakang ang kagamhanan sa pagsuporta na sab sa frontliners?
Sa pagkakaron, samtang nagtuki pa ang mga konsehal sa budget, mas maayong naa kanunay ang pundo nga magpadali sa pagtubag sa panginahanglan panahon sa pandemic. Sama sa pagkaon sa frontliners.