GIPADAPLIN una sa Cebu City Council ang P40 milyunes nga gahin alang sa packed meals sa frontliners, apil na ang mga nagbantay sa mga border control checkpoint.
Gusto sa ubang mga sakop sa Konseho nga mohatag una og kwentada ang administrasyon labot sa paggasto sa P160 milyunes nga gigamit sa pagtubag sa mga panginahanglan sa Siyudad ning panahon sa coronavirus pandemic. Ang budget gipaagi sa resolusyon nga gipangamahanan ni Konsehal Raymond Alvin Garcia.
Ang P40 million gamiton unta para sa packed meals alang sa kapulisan nga gabantay sa checkpoints, doctors ug nurses sa Cebu City Medical Center (CCMC) ug sa New Normal Oasis for Adaptation and a Home (NOAH), apil na ang support staff ug pasyente nga anaa sa Noah.
Ang frontliners ug pasyente gigahinan og P100 matag meal o P300 matag adlaw alang sa tulo ka kaonan.
Nikwestyon si Councilor Nestor Archival sa budget kay aduna nay naapruban nga P160 million para sa mao nga gastuhan.
“We already spent around P160 million for this... for me this is just wasting money,” matod ni Archival.
Matod ni Garcia nga nahurot na ang P160 million nga naapruban niadtong Marso ug kinahanglang pun-an para di mahunong. Matod ni Garcia nga “15,000 mouths” ang gipakaon sa Siyudad niadtong naa pa ang Sugbo sa enhanced community quarantine (ECQ).
“The 160 million has been consumed, it’s already been eight months,” tubag ni Garcia.
“It’s pandemic, it’s not an ordinary time. They’re doing extraordinary things and they’re risking their lives. I don’t think we should curtail them from food (provision),” segun niya.
Si Vice Mayor Michael Rama niklaro nga way intensyon ang konseho nga hunungon ang pagpanghatag og packed meals sa frontliners.
Matod ni Rama nga aduna lay kinahanglan tarungon una mogahin og laing kwarta.
“No, thats a misnomer, misunderstanding. We will definitely be addressing. Naa lay mga concerns... we’ve been wanting that liquidation issue addressed,” matod ni Rama.
Ang P40 million gi-reprogram nga kwarta ubos sa City Disaster Risk Reduction and Management Office (CDRRMO).
Matod ni Rama nga andam siya mopatawag og special session aron matuki og tarong ang isyu.
MAAPEKTUHAN
Dakog epekto sa pagdumala sa kapulisan sa siyudad sa Sugbo sa mga quarantine control points sa kadalanan kon wagtangon ang packed meals sa mga pulis.
Matod ni Police Colonel Josefino Ligan, hepe sa kapulisan sa siyudad sa Sugbo, nga kon mawala na ang meal allowance sa mga police,kuhaan nila ang mga personnel nga gipakatap.
Pasabot ni Ligan nga ang mga nag bantay sa quarantine control points mga sakop sa Crisis Response Battalion Management nga gi house sa Cebu City Sports Center.
Gituyo nga hatdan silag pagkaon aron di na sila mamahawa sa ilang pwesto ug makatutok sila sa pag bantay sa mga tawo nga nag laroy-laroy lang sa dakbayan sa Sugbo.
“Pananglit gyud og mawala na kanang mga tawo nato, dapat gyud ana nila organize messing na sila kay dili man na pwedeng mag balon padulong sa checkpoint kay wala man silay kalutoan kay naa man sila sa Abellana,” matod ni Ligan.
Kon kini mahitabo, dugang ni Ligan nga ang ipabilin nalang nila ang border control points sa kasikbit nga lugar sa probinsya sa Sugbo.