MOABOT og P13 milyones ang kantidad sa butane canisters nga nasakmit sa mga sakop sa National Bureau of Investigation (NBI) sa ilang mga raid sa tulo ka mga barangay sa dakbayan sa Talisay sa Disyembre 1, Martes.
Kini mao ang barangay Cansojong, Jaclupan ug Tabunok, diin nasikop ang siyam ka mga tawo.
Subay sa reklamo nga nadawat sa NBI gikan sa usa ka pribadong kompaniya kinsa nanag-iya og lehitimong refilling station sa butane, ilang nasayran nga nagtukod na og refilling station sa syudad ang kanhi kustomer, apan sa illegal nga paagi.
Gawas sa refilling backyard, namaligya usab sila og mga butane nga supak sa gimbut-an sa Department of Energy (DOE) ug sa Section 170 sa Republic Act 8293 o Intellectual Property Code of the Philippines.
Sa maong operasyon, dala sa mga sakop sa NBI-7 ang search warrant nga giisyu ni Regional Trial Court (RTC) Judge Ramon Daomila sa Branch 11.
Ang pag butang og refilling backyard giisip nga hazardous kun delikado tungod sa posibleng explosion ug sunog.
Niadtong Septiyembre 24, 2019, usa ka sunog niigo sa usa ka balay nga gigamit nga butane refilling station sa sityo Dawis, Barangay San Roque, dakbayan sa Talisay.
Daghang mga tangke sa liquefied petroleum gas (LPG) ang ningbuto atol sa sunog.
Gisuwayan sa Superbalita Cebu pag-follow-up ang NBI labot sa mga impormasyon sa mga dinakpan, apan way tubag.