WAY nakitang kalapasan ang kapulisan sa probinsya sa Sugbo sa panagtapok sa mga tawo nga ningsaksi sa Suroy-Suroy Sugbo sa lungsod sa Madridejos, isla sa Bantayan, niadtong Nobiyembre 27, 2020.
Matod ni Police Regional Office Director, Brigadier General Ronnie Montejo, nga nadawat na niya ang investigation report sa Cebu Police Provincial Office nga maoy gitahasan nga mosusi.
Sigun sa nakita ni Montejo sa report sa CPPO nga gipirmahan ni Police Colonel Aladdin Collado, hapsay ang pagpangandam sa kapulisan ug lokal nga kagamhanan sa lungsod sa Madridejos.
Apan sa dihang miuwan niadtong tungora, nagtapok ang mga tawo sa usa ka lugar aron mopasilong nga maoy nakita sa mga hulagway nga gisaway sa mga netizen.
“Sa nakita nako ug nabasa nako base sa ilang report, okay ang start permiro. Murag didto nag koan sa dihang nag-ulan nga ang normal reaction sa mga audience ang nahitabo, nagdinaganay didto sa tent kay mosilong bah,” matod ni Montejo.
Dugang ni Montejo nga adunay rekomendasyon ang CPPO nga sa sunod Suroy-Suroy Sugbo nga himuon sa Kagamhanan sa Lalawigan sa Sugbo, ila nang pangandaman ang pag-uwan aron dili na masubli ang nahitabo sa Madridejos. (AYB)