GIHAKOP sa kabalaka ang pipila ka mga lumolupyo sa sityo Upper, Barangay Malubog, bukirang dapit sa Dakbayan sa Sugbo, tungod sa ka daghan na sa mga kanding nga nangamatay.
Matag kanding dunay agi sa pinaakan sa liog samtang ang uban gilaslas ang ginhawaan.
Dunay mga lumolupyo nga nagtuo nga “sigbin” ang naghimo niini tungod sa agi sa mga pinaakan. Niadtong Huwebes, Disyembre 3, ug Biyernes, Disyembre 4, katapusang giatake ang mga kanding.
Labing minos,21 ka mga kanding ang gipatay. Moabot sa 18 ka mga kanding ang nangamatay sa Huwebes sa gabii samtang niadtong Biyernes laing lima.
Matod ni Charlene Sanico, 39, taga Sityo Upper Malubog, upat sa ilang kanding ang napatay. Duna kini mga samad sa liog samtang ang uban sa tiyan.
“Natingala na lang gyud mi sa akong bana kay pagmata namo, mao na to nga ang upat gyud ka kanding namo pulos nanghigda na. Unya wala nay dugo, mura man og gipangsupsupan og dugo gyud,”matod ni Sanico sa Superbalita Cebu.
Ila na lang usab nga nadiskobrehan nga di lang ang ilang kanding ang gipangpatay, apil na sa ilang mga silingan.
“Apil mi magtugway unta sa among kanding. Unya mao na lang to among naabtan. Unya sa among pagpakisayod sa among mga silingan, apil man pud diay ang ilang kanding,” dugang ni Sanico.
Matod ni Sanico nga usa sa ilang silingan nakakita mismo sa mipatay sa ilang kanding.
Gihulagway kini nga duha ka samag dagko nga mga iro nga dunay duha ka mga tango.
Ang maong mga mananap paspas nga midagan palayo sa ilang nahimutangan ug milayat sa sapa.
“Mura ra daw og balewala ang sapa oi. Miambak patabok sa laing tampi sa sapa ug padayon ra gihapon sa pag dagan ang kadtong ilang nakit-an nga matud pa dakong iro,”dugang ni Charlene.
Nabantayan usab sa mga lumolupyo sa nahisgutang barangay nga nahitabo ang katingalahan nga mga insidente kon takdol ang buwan.
“Mao gyud na, Sir, nga kon tingtakdol sa buwan, mao na ang masugatan namo inig ka buntag. Sa nanglabay, walay namatay nga kanding namo niadto, apan karon na gyud,” dugang ni Sanico.
IRO RA
Samtang si Malubog Barangay Captain Dennis Dabuco sa pakighinabi sa Superbalita Cebu niingon nga kon siya ang pasultion, iro ang iyang gidudahan.
“Ah dugay raman na oi. Adto pa man nang Marso. Unya duna pud gali panghitabo nga mao ra usab nga kaso, nautrohan adtong Mayo. Niadto pud Agusto ug niaging buwan. Adtong Huwebes naa sab ug katapusan adtong Biyernes naa sab,” butyag sa kapitan sa Superbalita Cebu.
Iyang giangkon nga tulo sa iyang mga kanding lakip sa napatay ingon man naalarma ang pipila ka mga lumolupyo.
“Ah wala man siguroy katingad-an. Iro ra man siguro na kay matud pa sa mga estorya didto sa ibabaw, mga dagkong iro daw ang ilang nakit-an.Pero tungod sa ilang kahadlok, mao to nga nanago pud sila,” dugang sa kapitan.
Si Dabuco mimando na sa iyang mga barangay tanod sa pag susi ug pagpangutana sa lugar kon unsa pa ang dugang makuha nga kasayuran.
Awhag ni Dabuco sa mga residente nga kon mahimo ipaduol na lang ang ilang mga kahayopan sa ilang mga mga panimay.
Dugang ni Dabuco nga ang iyang mabuhat sa kasamtangan mao lang sa una ang pag pamonitor sa iyang mga tanod sa pag patrolya kanunay.
Ang sigbin usa ka hayop sa kasugiran kun folklore sa Pilipinas. Hayop sa kagabhion nga mosuyop og dugo sa ilang mabiktima.