Maayo nga panglawas, dunay igong savings ug investment, nindot nga trabaho, buhong sa pagmahal ug pagpangga sa pamilya ug uban pa, ang pipila sa mga butang nga gipasalamatan ni Gelita “Gel” Alcantara sa iyang pagpuyo dinhi sa kalibotan.
Si Gel nisaulog sa ika-29 nga kasumaran sa iyang adlaw nga natawhan niadtong Nobiyembre 27.
Ang kasaulogan gihimo sa kan-anan sa iyang maguwang nga babaye, ang Gel’s Cuisine sa dan Urgello, Sambag 1 sa siyudad sa Sugbo.
Ang iyaha ra usab nga maguwang nga si Geline Alcantara-Mejares ang nagluto sa ubang mga sud-an sa salosalo.
“My sister is a very good cook. My parents are good cook, too. So, me and my siblings really cook well,” dugang ni Gel.
Apil sa ilang gisaw-an ang lechon, shrimps, ginabut, dinuguan, buttered chicken, caldereta, spaghetti ug special maja blanca.
Tungod kay aduna may health ug safety protocols nga gimando ang gobiyerno, gi-limit ni Gel ang mga bisita nga gidapit sa okasyon.
Niapil sa selebrasyon ang iyang mga suod nga higala ug mga miyembro sa ilang pamilya nga gikan pa sa lungsod sa Tuburan.
“Compared before, pwede daghan and pwede outside sa place and I can invite as many as I can. Pero much better karon kay I was able to invite my closed friends since they are not busy,” matod ni Gel.
Unsay espesyal sa kasaulogan sa iyang birthday karong tuiga?
Nagkita sila og balik sa iyang mga suod nga higala nga sila si Kim Hernandez, Via Krista ug Regine Godinez labi na sa iyang bestfriend nga si Geraldine Andales.
Panghinaut niya nga makauban og balik ang iyang suod nga mga higala sa kolehiyo nga sila si Kim, Mariel, Geraldine ug Agnes nga wala makatambong sa selebrasyon sa iyang birthday karong tuiga.
Sila pulos ni-graduate sa Cebu Normal University sa kursong Bachelor of Arts in Communication ug mga kanhi intern sa Superbalita Cebu niadtong 2011.
Ang pag-us-os usab sa iyang timbang giisip ni Gel nga espesyal nga regalo alang sa kaugalingon.
Gikan sa 64 kilos, nikanaug kini sa 50 kilos.
Mapasalamaton usab si Gel sa iyang trabaho nga dako og ikatabang sa iyang mga bayrunon sa balay.
“I am contented that I have roof to shelter me and my family. We have always enough food on our table. And we can buy our needs,” pahayag sa pagpasalamat sa dalaga. “My 29th birthday was very simple yet it was blast, with my true friends,” dason ni Gel. (SCG)