DIGOS CITY -- Gianunsyo sa lokal nga gobyerno nga mawagtang na ang naandang “one-stop- shop” alang sa pag-renew sa Business Permit ug lisensya karong Enero 2021.
Gibutyag ni Mayor Josef Cagas nga kinahanglan kining pagabuhaton aron malikay ang mga negusyante sa pandemya.
Apan, luyo sa padayong pagsaka sa mga natakbuyan sa COVID-19 sa dakbayan, magpadayon gihapon ang lokal nga gobyerno sa pagpahigayon og renewal sa mga permit ug lisensya sa mga negusyante gikan Enero 1 hangtud 20.
Giklaro sab sa mayor nga himoon kini pinaagi sa pag-iskedyul sa matag barangay aron malikayan ang panagtapok ug padayong ipatuman ang health security measures.
Human mikatag ang mga balita nga magsirado ang mga establishemento ug ipailawom sa lockdown ang dakbayan, gitataw ni Cagas nga dili motoo sa mga fake news ug bugtong ang City Information Office ug City Government of Digos Facebook page lamang ang angayang tuhuan aron di mag-panic ang publiko.
Sa kasamtangan, unom ka bag-ong kaso sa COVID-19 ang natala sa City Health Office hinungdan nga misipa na sa 363 ang nataptan sa kagaw.
Sa maong ihap, 282 ang nakarekober, 70 ang anaa sa tambalanan ug 11 ang namatay.
Gawas niini, aduna sab 641 ang suspek, usa ang probable, 168 ang gipailawom sa strict home quarantine ug 27 ang anaa sa city isolation unit. (OBD)