Nabanggaan patay

■ NAGUBA: Usa ka awto naguba human naapil sa pagkabangga sa trailer truck sa Purok Mahogany, Barangay Estaca, lungsod sa Compostela, Dominggo, Disyembre 6, pasado alas 2:40 sa kaadlawon. / Compostela police
■ NAGUBA: Usa ka awto naguba human naapil sa pagkabangga sa trailer truck sa Purok Mahogany, Barangay Estaca, lungsod sa Compostela, Dominggo, Disyembre 6, pasado alas 2:40 sa kaadlawon. / Compostela police

USA ka ulitawo nga nagsakay og motorsiklo ang nadasmagan-patay sa trailer truck sa national highway sa Purok Mahogany, Barangay Estaca, lungsod sa Compostela, Dominggo, Disyembre 6, pasado alas 2:40 sa kaadlawon.

Si Aaron Tagalog, 18, taga Purok Gumamela sa Barangay Estaca gideklarar nga dead-on-arrival (DOA) dihang nadangat sa tambalanan sa dakbayan sa Danao.

Ang drayber sa trailer truck mao si Manuel Lipon, 40, dunay kapuyo ug taga Barangay Tayud, lungsod sa Consolacion, kinsa gitanggong samtang nagpaabot sa pormal nga reklamo sa kabanay sa biktima atol ning pagkuha sa taho.

Si Police Captain Vincent Zozobrado, hepe sa Compostela Police Station, nagkanayon nga ang biktima sakay sa Yamaha nga motorsiklo gikan sa Poblacion, Compostela kay nagpalit og sigarilyo.

Sa pagbalik niya pauli sa ilang dapit, dugang sa hepe, pag-abot sa nahisgutang lugar, kalit nga mi-left turn hinungdan nga nabangaan sa nagsunod nga trailer truck.

Matod pa, ang drayber sa trailer truck kalit nga mi-brake apan tungod kay kusog ang dagan ug kabug-at ang trailer truck, misarasay kini ug naigo ang motorsiklo.

Gikataho na nalagpot ang biktima ug nakaangkon og grabeng bun-og.

Samtang, dugang sa hepe, ang trailer truck nibabag sa national highway ug niabot sa pikas nga lane sa karsada, nidasmag usab sa laing duha pa ka mga motorsiklo nga gi-park ug usa ka awto hinungdan nga pulos nangaguba.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph