PILA na lang ka katulog Pasko na. Pinaka una nga Pasko sa atong panahon nga kini atong saulogon dala ang mga kabalaka, kahingawa ug kahadlok nga mataptan sa makamatay nga virus. Wala koy mahinumduman nga selebrasyon sa Pasko nga sama niining sitwasyon karon. Tinuod dunay daghang Pasko nga maisip nato nga apiki ang pagsaulog tungod sa mga personal nga rason. Duna say Pasko nga wala pa makabangon ang mga tawo gumikan kay bag-o pa naagian og katalagman.
Pananglit niadtong panahon nga niigo ang bagyong Ruping dinhi sa ato. Daghan ang namasko nga way kuryente sanglit niadtong panahon nilanat man og dugay ang pagpabalik sa sugang dagitab. Ang uban wa pay connection sa tubig. Ug kadaghanan nagsigi pa og pamanday sa nanguba nilang mga balay. Bisan pa man nakahigayon gihapon kita pagsaulog sa Pasko. Di sama karon nga pulos kabalaka ang naghari sa mga galamhan tungod kay nagsigi pa man sab ang pagpanghasi sa coronavirus.
May mga hulagway sa social media nga nagpakita sa mga dagko ug gagmay nga Christmas tree nga gipasiga ilabi na sa mga mall ug ubang balay patigayon. Nindot kaayong bisitaon aron magpahulagway dili ba? Nakabisita na ang uban. Apan mas daghan ang wala pa kay hadlok matakdan.
Ang lain nga rason og mao ni pinaka komon sa tanan, mao ang kalisod sa panginabuhi. Daghan ang way trabaho. May nanikaysikay pinaagi sa ginagmayng negosyo apan di sab maayo ang kita. Tungod sa pagtibugsok sa ekonomiya, napagan ang budget para sa pagsuroy suroy ning panahon sa Pasko. Ang gisiguro nalang mao ang kunsomo sa pamilya. Ambot kong malakip pa ba sa budget ang lamian nga pagkaon para sa Pasko.
Nalipay bitaw ko nga nadungog gikan sa usa ka higala nga naghisgut nga ang gamay niya nga tinigum para sa Pasko, ipuno nalang ngadto sa budget sa uban niyang mga higala aron mapahigayon ang giplano nga pagpanghtag og pagkaon ngadto sa mga kabus sa dili pa ang Pasko. Salamat kay naapil ko sa ilang listahan isip coordinator sa maong proyekto.
Ang target mao ang atong mga igsuong mananagat sa mga isla sa dakbayan sa Lapu-Lapu. Ginagmay nga regalo isip kabahin sa diwa sa Pasko.
Sa mga interesado nga mopaambit sa ilang grasya alang ning maong proyekto ato lang unya nga ipahibalo sunod nato nga Asoy ang pamaagi. Pero kon tuyo gyud ninyo kining buhaton, diha sa inyong mga dapit naay daghan nga nagpaabot nga mapiksan sa inyong grasya. Sama sa mga pamilya nga akong naaktuhan sa daghan na nga Pasko diin ako nagmonitor sa palibot, nakakita nako og linya sa mga tawo nga giaporan og mga pinaskohan.
Diha sa may A. Lopez, Barangay Calamba Cebu City, naka-over ko og molopyo nga nanghatag og bugas, sardinas apil na ang noodles ngadto sa mga kabus. Sa may Barangay Mambaling dili layo sa ilang barangay hall, mga igsuon natong mga Bajao maoy naglabi sa bul-og sa mga tawo nga gipang-aporan og mga pinaskohan. Sa may Cogon Pardo, duna say pamilya diha nga nahimo na nga tulumanon ang pagpaambit sa ilang grasya ngadto sa mga nanginahanglan.
Sa akong pagtuo ang ilang pagka manggihatagon magpadayon bisan ning panahon sa pandemya.
Manghinaot ko nga wa kaayo magrabehi kining maong mga tawo aron nga sa adlaw sa Pasko may mga regalo gihapon sila nga mapaambit. Ato silang ilakip sa atong mga pag-ampo. Gawas sa mga pinutos nga regalo, ang uban nagplano nga mag-ihaw og baboy aron ipaambit sa ilang mga silingan.