Barrita: Kamingaw ning taknaa
DAGHAN ang mga kausaban sa atong inadlaw nga kinabuhi nga nahitabo ug hayan mahitabo pa tungod sa Covid-19. Nag-una niini ang gawasnon nga pagsud-gawas sa balay sa bisan unsang takna. Limitado na kini karon, ilabi na sa mga menor de edad ug senior citizens.
Nagsingabot na ang Pasko. Sigi nag patukar ang mga estasyonan sa radyo sa mga Christmas songs. Angay na kitang maglipay ug magsadya. Apan ang uban nagpatulo sa luha samtang naminaw sa mga kanta sa Pasko, labi na kon sentimental kaayo.
Laing epekto sa Covid-19 mao ang pagkawagtang sa mga mananaygon. Kay ngano man? Miluwat si Cebu City Mayor Edgardo Labella sa Executive Order No. 104 nga nag-ban sa pagpanaygon, sa kadalanan ug kasilinganan aron paglikay sa pagkatap sa corona virus.
Ubos na kita sa modified general community quarantine (MGCQ), apan ang kurintinas naa lang gihapon. Matod ni Labella, kinahanglan ang caroling ban aron pagseguro nga magpadayon ang mga lagda batok sa pagkatap sa Covid-19, busa nanghinaut siya nga mosabot ang katawhan niini.
Ang manaygon, masikop subay sa antimendicancy ordinance nga gipatuman sukad sa 2015 nga nagdili sa mga manaygon sa kadalanan sa siyudad. Ang makalapas multahan og P500 o lima ka adlaw nga pagkapriso o walo ka oras nga community service. Wa nay manuktok sa inyong pultahan ug makuting-kuting sa ilang sista o bisan na lang unsa nga ginama nga instrumento nga iduyog sa yabag nga tingog sa pagkanta sa mga awit sa Pasko.
Apan wa ba mingawa ang mga tawo sa daygon nga “Kasadya Ning Taknaa"? Ang maong kanta gi-compose ni Vicente Rubi niadtong 1933. Ang lyrics niini kang Mariano Vestil. Gisunod kini ni Levi Celerio ug gihimong Tinagalog nga “Ang Pasko Ay Sumapit.”
Kinsa kahay makalimot sa lyrics niini nga nagkanayon, “Kasadya ning taknaa/ Dapit sa kahimayaan/ Mao day among nakita/ Ang panagway nga masanagon/ Bulahan ug bulahan/ Ang tagbalay nga giawitan/ Awit nga halandumon sa tanang Pasko magmalipayon!
“Bag-ong tuig/ Bag-ong kinabuhi/ Duyogan ta sa atong pagbati/ Atong awiton, atong laylayon/ Aron kita magmalipayon/ Awit nga halandumon/ Sa tanang Pasko magmalipayon!”