Pag-spark sa linya kuryente sa poste ang gitumbok nga hinungdan sa sunog sa Sitio Superior, Barangay Looc, Mandaue City sa Dominggo sa gabii, Disyembre 6, 2020, sigon sa mga lumolupyo.
Nagsugod ang sunog alas 10 sa gabii sa Disyembre 6 ug hingpit nga napawong sa alas 2:49 sa kaadlawn. Niugdaw kini og 96 ka mga balay ug nidanyos og P1.4 milyones.
Sa pakighinabi sa Superbalita Cebu kang Jean Jayag, 31, siya niingon nga ang poste duol sa balay sa iyang ig-agaw ni-spark.
Sa maong dapit duna silay kurtina nga gituohan nga dali nga nakapadako sa kayo.
Ang poste nahiluna sa luyo sa balay nilang Jayag ug natung-an sa mga balay.
Sa inisyal sab nga imbestigasyon nilang SFO2 Edgar Vergara, fire investigator sa Mandaue City Fire Station, posibleng overloading sa kuryente ang rason tungod matod sa tag-iya sa Jayag residence nga nikidlap kidlap pa ang suga human ni-spark ang poste.
Matod ni Vergara nga posible kini kay hapit na ang Pasko, ang mga lumulupyo mitaod og mga Christmas lights.
Daghan na ang nakakonektar sa poste hinungdan nga nag-overloading ug mi-spark.
Miingon si Jayag nga matabang pa unta og pawong ang sunog kon adunay silay agas sa tubig atong hitaboa.
“Ang among problema gyud kay wala mi tubig. Asa man mi kuha og tubig (pangbanlas) nga asta among kanal walay tubig,” matod ni Jayag.
Way nabitbit nga mga gamit si Jayag, gisiguro lang niya ang paggawas nila sa ilang nasunog nga balay.
Pagbalik nila sa ilang balay human sa sunog, abo ang ilang naabtan.
Kasamtangang, gi-evacuate ang mga lumulupyo sa barangay gym ug sa Cesar Cabahug Elementary School.
Base sa inisyal nga taho ni Barangay Looc Captain Allan Siazon nga adunay 120 ka mga pamilya o 574 ka mga indibidwal ang nawad-an og balay.
Matod ni Siazon nga adunay pipila ka mga lumulupyo nga wa niadto sa gym tungod kay nila magpabilin sa ilang naugdaw nga balay ug magbantay sa ilang gamit
POSIBLENG ILEGAL
Gipahibawo sa Visayan Electric (Veco) nga ang matag transformer ug angwires nga giinstalar alang sa mga kustomer anaa pay igong allowance kon ugaling mosaka ang kunsumo sa kuryente.
Matod ni Quennie Bronce, pangu sa reputation enhancement department sa Veco, ang pag-overloading sa mga linya tungod sa mga ilegal o unauthorized nga pagkonektar sa poste.
Matod niya nga kon adunay pagsaka sa paggamit sa kuryente sa usa ka lugar, magpahibawo dayon sa ilang buhatan aron i-upgrade ang mga linya ug poste.
Gipahinumdom sab sa Veco nga delikado ang illegal connections. (KFD)