DAVAO DEL SUR -- Gipailawom sa pagbansay ang mga tanod sa lima ka mga barangay subay sa mando sa Department of the Interior and Local Government (DILG) adlaw'ng Dominggo, Disyembre 6.
Mismong mga sakop sa 39th Infantry Battalion (IB) sa Philippine Army ug mga sakop sa Revitalized Pulis sa Barangay (RPSB) team maoy nangulo sa maong training ug seminar nga gihimo didto sa Barangay Colonsabac sa lungsod sa Matanao.
Sumala ni Engr. Raymund Olivo, DILG officer sa lungsod, nga mga gitun-an nga mga tanod nga nagagikan sa mga barangay sa Colonsabac, Asbang, Savoy, Saub ug Cabasagan mao ang Rule 113 sa Rules of Court (arrest, search and seizure) ug mga pamaagi sa pag-posas sa usa ka suspek.
Si 1st Lieutenant Denise Cortejo, pamuno sa Alpha Company sa 39th IB, nanguna sab sa lecture kon unsaon paggamit ang arnis ug hand to hand combat ugaling maipit ang mga tanod sa takna nga dunay husayon nga gubot sa ilang lugar.
Human nakakuha og pamaagi, nakibhangan ang kabalaka sa mga tanod ugaling mosukol kanila ang mga arestuhong sibilyan.
Gitudloan sab sa mga pamaagi sa intelligence reporting aron mas mohanas pa ang ilang pagkalap og impormasyon nga naglambigit sa seguridad sa ilang lugar.
Sumala sa kapulisan ug militar nga mas molig-on pa ang Barangay Defense System karong adunay bag-ong nakat-onan ang ilang mga counterpart sa barangay. (Orlando B. Dinoy)