DEAR Noy Kulas,
Maayong adlaw. Tagoa ra ko sa ngan nga Melay. Taga Cebu City ko ug nagtrabaho na.
Ang akong problema mao ang duha ka mga lalake sa akong life ug sa akong sitwasyon karon. Ingon ani ang nahitabo. Three years kapin na mi sa akong boyriend bisan kon kadaghan na mi magbuwag ug mag-uli kay magsige ra mi og away. Hangtod nga akong nakaila ang usa niya ka amigo nga opposite kaayo niya, grabe ka buotan apan funny nga guy. Not the same sa akong boyfriend nga grabe ka serious ug seloso.
Nagka-textmate mi sa iyang amigo ug nagkadugay, nagsige na mi og secret og kita. Until nanguyab siya nako sa hilom ug ako siyang gisugot. Yes, Noy, nag-two timer ko kay bisan unsaon, ganahan ko ani nga guy kay sa akong BF. Naa na sab nahitabo namong duha. Ug mao ni ang akong problema karon kay mabdos ko. Wa ko kahibawo kinsa ang father ani, ang una o ikaduha nako nga BF.
Wa pa koy gisultihan nilang duha kay maghuwat ko sa imong tambag. Maayo unta imo dayon ko matambagan. Daghan kaayong salamat.
MELAY
Melay,
Sultihi silang duha sa imong kahimtang ug tan-awa ang ilang mga reaction. Kay basin naa na sab nyay moingon nga DNA (di na ako) kay mao ra ba nay diskarte sa mga lalake nga maayo kaayo modalag atik sa babaye. Unyag burot na, abot sa Mars ang pag-deny nga sila ang amahan. Naa pay uban nga moingon nga baog kay wa momabdos ang ubang babaye.
Kanang ikaduha kahibawo na siya nga posibleng di siya ang papa kay duha sila. Ang usa wa kahibawo. But in the future, pinaagi sa DNA testing, kana kon mogasto ka or usa nila, labina kanang ikaduha, mas maayo. Unya kay mabdos ka man ug wa mahibawo kinsa ang papa, ayaw sa paghisgot og kasal kay basin ang lalakeng mopakasal nimo di maoy amahan.
Sa pagkakaron, cool off lang una ang imong relasyon sa ikaduha kay basin ikaw unya ang hinungdan sa away nilang duha. Pasabta lang nang second guy nga nag need kag peace of mind samtang magmabdos. Pagsabot mong duha sa pamaagi ug mahitabo kon unsaon pagpakisayod kinsay amahan. Ayaw lang sab nang nawong basehi kay usahay di na accurate. Concentrate una sa mga buhatunon sa pagmabdos. Ayaw una hasula imong huna-huna kinsay papa.
NOY KULAS