Libre na? Makalingkawas kaha ang kapulisan ug ang mga opisyal sa lungsod sa Madridejos, Bantayan Island, Cebu pinaagi sa deklarasyon sa Police Regional Office-7 nga walay silay tulobagon sa wala pagtuman sa social distancing niadtong Nob. 27, 2020 atol sa Suroy-Suroy sa Sugbo, nga programa sa turismo sa Kapitolyo nga gipahigayon sa Kota Park, Madridejos, tungod sa uwan?
Ang gibasihan ni PRO-7 Director, Brig. Gen. Ronnie Montejo sa iyang deklarasyon nga nagtapok ang mga tawo sa suroy-suroy sa Madridejos tungod sa uwan mao ang “investigation report’ nga gisumitir ni Cebu Provincial Police Office Director, Col. Aladdin Collado. Dugay-dugay gyud to nga uwan kay taas man nga panahon nga nagtapok gihapon ang mga tawo.
Atong mahinumduman nga si Interior Secretary Eduardo Año miorden nga imbestigahon ang kalihokan human migawas sa social media ang mga hulagway nga daghan ug nagsikit ang mga nanambong nga gisaway og maayo sa mga netizen tungod kay wala motuman sa social distancing.
Ang DepED-7 mipahigayon usab og pakisusi tungod kay dunay mga batan-on nga nagsul-ob og uniporme sa eskuylahan nga miapil sa maong kalihokan. Matod pa ni DepEd 7 Regional Director Salustiano Jimenez, nga pahamtangan ang mga responsable nga mga maestra. Apan di ko mahibung unya og moingon ang nagsusi nga dili na to sila mga batan-on. Mas grabe pa gyud nga kataw-anan kon moingon ang nagsusi nga di to sila mga estudyante apan nagsul-ob lang sa uniporme.
Akong gitan-aw og usab ang maong kalihokan pinaagi sa Youtube usa ko nagsuwat ning akong lindog. Maayo unta og tan-awon usab ni General Montejo ang gipagawas sa Youtube kay basi sa akong nakita walay uwan ug nagpundok man ang mga nanambong ilawom sa mga tent tungod sa kainit sa panahon. Basin lang sad kon ang nagvideo o naghulagway miundang sa dihang miuwan.
Human sa grabe nga mga pagsaway, nanghambog si Madridejos Mayor Salvador dela Fuente nga “Covid-free” ang iyang lungsod tungod kay walay nahibaw-an nga dunay nasakit sa Covid-19. Mayor sa Dec. 10 pa baya ang ika-14 ka adlaw. Angay nga magpasalamat ta kon ugaling tinuod ang gisulti sa mayor. Gani, manghinaut ta nga walay masakit sa Covid-19. DOH-7 unsa katinuod ang gipasiatab sa mayor?
Sa lain bahin, ato ba nga sabton nga ang investigation report nga gisumitir ni Colonel Collado ngadto ni General Montejo mao na to ang resulta sa imbestigasyon sa DILG? Hinumdumi, ang pulis ubos sa DILG. Ang DepEd-7, kanus-a sad ta makahibawo sa resulta sa ilang pakisusi?
Ang mga dinapit niadtong suroy-suroy sa Madridejos mao si Sec. Harry Roque, Presidential Assistant Mike Dino, ug mga kandidata sa Miss Universe. Usa ka dakong dungog alang ni Gov. Gwen Garcia, nga bisan aning pandemya sa Covid-19 iyang gipalihok ang lokal nga turismo nga makatabang og buhi og balik sa ekonomiya sa probinsya. Apan igo ra ba kon ang taga Cebu ra ang magsuroy-suroy tungod kay gidili pa man ang moari gikan sa lain nga probinsya?