Rally ni Cagas gilabay'g bato

NAGUBOT ang gihimong political rally ni Davao del Sur Governor Douglas Cagas didto sa lungsod sa Malita, Davao del Sur, human sila gilabay, gipintik og bato.

Gawas sa giingong pagpintik ug pagpamato gipangsuyakan sab ang mga sakyanan sa mga supporters ug campaigners sa Nationalista Party (NP).

Sa impormasyong gitunol sa Sun.Star Superbalita, giingong Huwebes sa gabii samtang nagtapok ang katawhan ug naminaw sa election rally kalit lamang nilupad ang duha ka mga gagmay'ng bato ug didto aduna na'y naninggit nga nakaparatol sa mga tawo, aron sila nag-iyahay og panagan.

Sa impormasyon gitataw nga natapos na sa pagpamulong si Cagas dihang gibato ang iyang rally ug gihimo kini samtang niabot na ang kangitngit.

Wala sab dayon natala sa police blotter ang nahitabo mao nga sa pakighinabi sa Superbalita si Supt. Victorina Mendez, hepe sa Malita police station, hugot nga milimod nga may nahitabong linabaya'y og mga bato niadtong higayona.

"Wala naglabayay. Naa lang duha ka bato nga nitugpa sa atubangan pero wala mi kabalo kung asa gikan kay naa may ni-siyagit og kusog," ni Mendez nga nahinabi sa iyang telepono.

Apan gikumpirma ni Davao del Sur Provincial Police Commander Police Senior Superintendent Ronald Dela Rosa, nga aduna'y nahitabong kaguliyang niadtong higayona.

"Naa daw naglabay og bato pero human na ang rally sa NP. Nanagan ang mga tawo pero wala'y naigo ug wala'y na-injured," ni Dela Rosa.

Si Cagas giingong apil sab nga target unta sa pagpamintik apan wa siya maigo.

"Even to the comfort room of the police outpost, pagbalik nako gikan ko nangihi naa na say bato," ni Cagas kinsa nakurat sa nahitabo.

Giiingong usa ka babaye sab ang nakuyapan human naigo sa pintik ang iyang lawas ug ang tanan wala'y laing gipasanginlan kun di ang mga supporters sa mga Bautista.

Si Alberto "Matoy" Balliota kinsa kandidato ni Cagas pagka-Congressman sa Distrito 2, nisugilon nga iyang nakita nga naglibot-libot ang mga supporters sa mga Bautista ug daw naniid kun nganong gidugok sa daghang tawo ang ilang proclamation rally.

Matod pa naundang lang ang paglupad sa mga bato human adunay nakuyapan.

Ang pipila ka molupyo sa Barangay Lagumit kinsa nisaksi sa rally natanggong didto sa Barangay Tigulo, sanglit hiyos na ang ligid sa ilang mga sakyanan human gipangsuyakan.

Sa pagpanubay upat ka mga sakyanan ang nasuyakan.

Matod ni Cagas nga usa kini ka desperadong lakang sa mga Bautista.

"These are acts of desperation mao kadto ang timaan nga dili madawat sa mga Bautista ang ilang kapildihan."

"Unta kay piniliay man ni hatagan nato og kagawasan ang katawhan nga maminaw sa rally," ni Balliota sab.

Gitudlo sa kapulisan nga usa ka alyas Achong Albor ang suspek kinsa trabahante sa umahan sa mga Bautista apan hugot kining gilimod sa uwahi.

Hinuon gitataw sa mga Balliota nga di na sila mopasaka og kaso.

Apan hugot nga gilimod sa mga Bautista nga ilang mga supporters ang naghimo sa ingon.

Mismong si Malita Mayor Benjamen Jr,. nikanayon nga posible pa nga gikan ra sa mga supporters sa mga Balliota nanukad ang pagpamato.

Matod niya nga nihimo pa og gimmick ang partidong NP pinaagi sa pag-rekorida sanglit sa wa pa mahitabo ang rally gipasiatab niini nga moabot sila si Manny Villar ug mga artista kauban si Willie Revillame.

"Sa ilang lang pag-announce nga moabot si Villar ug si Revillame gilinla na nila ang katawhan, so posible masuko gyud ang tawo nila. Abi ninyo ang among pamilya di gyud gusto mahilabtan si Dodo Cagas kung nia siya sa Malita kay sigurado kami gyud ang pasanginlan," pasabot ni Mayor Bautista.

Gumikan niini gilantaw nga mas moinit pa ang election sa lalawigan sanglit aduna'y impormasyon nga nakaabot sa Superbalita nga mohimo'g pagpanimawos ang mga supporters ni Cagas ugaling mohimo sab og rally ang mga Bautista dinhi sa Distrito 1.

"Delikado gyud ba kay naa mi nadunggan nga granada sab ang ibalos," usa ka text message nga nadawat sa Superbalita nikanayon.

Sa nagkainit nga dagan sa piliay dinhi sa lalawigan nabalaka karon ang katawhan nga mas mosamot pa kainit ang mga supporter sa matag pulitiko kini luyo sa "Peace Covenant" nga gilagdaan sa ilang mga kandidato atubangan ni Bishop Guillermo Afable, mga kadagkuan sa Philippine National Police, Armed Forces of the Philippines ug Commission on Election. (Dondon Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph