NALINGAW ko niadtong miaging gabii dihang naglantaw kami sa usa ka balita sa telebisyon labot sa paggamit og "uway" sa mga pulis sa ilang pagpatrolya didto sa kaulohan.
Ang nakalingaw nako ang komentaryo sa akong kauban nga nagtan-aw sa maong balita nga suma pa niya, walay pulos ang Commission on Human Rights (CHR) nga nagkanayon nga di kinahanglan ang paggamit sa "uway" sa pagpatuman sa protocols sa pagpugong Covid-19 nga mokuyanap sa nasud.
Gipasabot ni CHR Spokesperson Jacqueline de Guia nga sa panahon karon, kinahanglan nga ipatuman ang health protocols nga haum sa tawhanong katungod samtang ang nasud padayong nakigkombati sa makamatay nga kagaw.
"As such, we wish to caution the government against unnecessary use of force and actions that may lead to humiliation and trauma. Violence, even in its slightest suggestion, is not the best way to address the pandemic," suma ni De Guia sa usa ka suwat pamahayag.
Hinuon, gipasalig sa kapulisan nga gamiton lamang nila ang "uway" sa pagsukod sa usa ka metro nga social distancing ug paghiling sa dala sa mga tawo nga moagi sa ilang checkpoint.
Sulti pa sa akong kauban nga nagtan-aw sa balita, mas maayong bungkagon na ang CHR tungod kay nakapugong kini sa gobyerno sa paghimo og maayong paagi sa pagdumala sa nasud.
Dugang pa niya nga mas maayong latuson ang mga gahi og ulo nga mga katawhan aron motagam ug di na molanat og dugay ang pandemya.
Naa sab hinuon siyay punto, apan duna kitay balaod nga nanalipod sa katungod sa katawhan, mao nga di ako uyon nga hatagan nato og oportunidad ang mga otoridad nga mayatakan ang katungod sa katawhan.
Di nako mabasol ang sama niya og panghuna-huna nga mga tawo sanglit mao man gud kini ang ilang madungog sa pipila ka lider sa nasud nga kanunay nga nagsaway ug wa nagtamod sa mandadto sa CHR.
Di lang inilang politiko ang nagsulti nga walay pulos ang CHR, apan apil na niini ang libuan ka mga netizens nga nagpaskin sa maong black propaganda sa social media.
Alang nako, ang pagsulti nga walay pulos ang CHR usa ka dakong bakak tungod kay namugna kini nga ahensya subay sa gahum sa 1987 Philippine Constitution nga ang mandato mao ang pagpanalipod sa mga dinaugdaug.
Magpabilin kini nga pagtuo nga walay pulos ang CHR kung motuo kita sa bakak nga propaganda.
Kining pagsulti nga walay pulos ang CHR nakapahinumdom nako sa giingon sa propagandista ni bantugan nga Adolf Hitler nga si Joseph Goebbels nga: "If you tell a lie big enough and keep repeating it, people will eventually come to believe it."
Busa, sa di pa kita motuo sa propaganda ni bisan kinsa, ato gyung susihon kung unsa ang tinuod, mga higala.