KANTIDAD og P518,000 ang nadawat sa kanhi rebelde pinaagi sa Firearms Remuneration Program human mitahan og onse ka mga tag-as nga matang sa armas ngadto sa gobyerno.

Si Governor Jayvee Tyron L. Uy sa Davao de Oro personal nga mitunol sa tseke sa gipahinabo nga awarding ceremony didto sa headquarters sa 66th Infantry (Kabalikat) Battalion sa Barangay Cabinuangan, New Bataan nga gitambongan sa mga opisyal sa lokal nga ahensiya sa kagamhanan ug sa Philippine Army units.

Ang firearms remuneration maoy usa sa daghang mga tabang nga ihatag ubos sa Enhanced Comprehensive Local Integration Program o E-Clip sa Department of the Interior and Local Government nga maangkon sa kanhi mga rebelde kinsa boluntaryong mosurender og mga pusil.

Kini kabahin sa inisyatibo sa gobyerno aron nga madasig ang mga armadong miyembro sa New People's Army (NPA) nga mobalik sa sabakan sa balaod ug motahan sa ilang mga armas nga gigamit sa Communist Terrorist Groups sa pagpanghadlok ug panghasi ngadto sa mga komunidad.

Gitin-aw ni Noel Duarte, provincial director sa DILG-Davao de Oro, nga ang maong ganti o bayad sa kanhi rebelde "twice" sa "appraised cash value" sa mga armas base sa nakalatid nang daan nga implementing guidelines sa E-Clip ug gipailawom sa balidasyon sa "authorized body."

Samtang mapasalamaton ang kanhi rebelde ngadto sa paningkamot sa lokal nga panggamhanan ug sa Philippine Army alang kaniya ug sa iyang pamilya.

Matud niya nga ang iyang kinabuhi karon layo ra kaayo sa dihang kabahin pa siya sa kalihukan sa NPA. Matag adlaw iyang gipangutana ang iyang kaugalingon kon mabuhi pa ba siya o mamatay. Uban sa grasya sa Ginoo, bisan pa sa katuigan nga iyang gilulong sa rebulosyon, gihatagan gihapon siya og higayon nga mabuhi ug makauban ang iyang pamilya ug nitataw niini nga naa ang gobyerno aron nga motabang kanila.

Gipasalig sab niya nga iyang gamiton ang salapi alang sa maayo. Ug nagklaro nga ang siyam ka tuig niyang pag-abin sa mga kalihukan, natapos niadtong higayona ug mipasalig nga iyang ihalad ang iyang kaugalingon sa pag-alagad sa iyang pamilya ug sa gobyerno.