GIPASUSI na ni Mindanao Development Authority (Minda) Chairman Emmanuel "Manny" Piñol ang giingong illegal mining ug pagpamutol sa mga punoan sa kahoy sa protected area sa Mt. Apo sa Barangay Don Panaca, Magpet, North Cotabato.
Mismo ang buhatan sa Department of Environment and Natural Resources (DENR) ang nagpaabot sa impormasyon ngadto kang Piñol sa ilegal nga mina ug pagpamutol sa mga dagkong kahoy sa maong dapit.
Gisulti ni Piñol nga mga lokal nga opisyal maoy nalambigit sa ilegal nga pagmina ug pamutol sa mga kahoy sa tiilan sa Mount Apo.
Mga kalasangan ubos sa Mount Apo ang gikaingin ug gipangtamnan na karon og saging nga cavendish.
Gitahasan na ni Piñol ang iyang mga ginsakpan sa Minda nga makig-alayon sa Mines and Geosciences Bureau sa DENR alang sa halawom nga imbestigasyon kalabutan niini.
Ang resulta sa imbestigasyon direkta nga isumite ngadto kang Presidente Rodrigo Duterte.
Tinguha ni Piñol nga samtang sayo pa, mahunong na ang ilegal nga pagmina ug pagpamutol sa kahoy nga nahibilin sa maong dapit aron malikayan ang dagkong kalamidad sama sa pagbaha ug pagdahili sa yuta.