Nakigsabot na ang Pilipinas sa pipila ka mga pharmaceuticals sa gawas sa nasud nga nakamugna og bakuna karon batok sa coronavirus disease. Una niini, mao ang Astrazeneca, usa ka British-Swedish pharmaceutical company. Kini bisan kon ang maong kompaniya naghimo pa og mga clinical trials sa ilang produkto nga vaccine. Ang Pfizer-Biontech nakapagawas na sa ilang vaccine ug gani aduna nay giturukan sa United Kingdom.
Maayo kini aron dili usab kita mauwahi sa order kay daghang mga nasud nga nag-atang. Pero sigurado kaha ning ilang vaccine nga mogawas ug epektibo kaha kini? Hinaot nga dili magdaginot ang Pilipinas ani kay mao kini ang makatabang batok ning pandemya sa Covid 19.
Dihay usa ka eksperimento nga gihimo diin pipila ka mga tawo gipatilaw og usa ka matang sa bino. Ug matag usa gisultihan og lain-laing kantidad sa mao rang matang sa bino nga ilang giinom.
Ug unya ang gitug-anan og kinamahalan nga presyo sa maong bino niingon nga mao kadto ang kinalamian nga matang sa bino nga ilang natilawan.
Matod ni Victur Ricciardi, usa ka finance professor sa Baltimore College, ang atong enjoyment sa mahalon nga mga butang molugdang ngadto sa unsa ang atong pag-ila sa risgo. Kon mogasto kita og mahal sa mahalon nga bino, ato ning gilantaw nga “less risky investment” kay alang kanato basta mahal ang usa ka butang, labing siguro nga de kalidad kini nga butang.
Pero samtang husto kanang maong eksperimento, dili usab nato kalikayan ang gi-ingon nga “there is no such thing as free lunch.” Ang tanan ning kinabuhia adunay presyo. Kon magkabug-at ang kamahinungdanon sa usa ka butang, mas magkadako ang iyang presyo. Sama sa kinabuhi sa tawo.
Ato bang matugbangan og kantidad sa sapi ang atong kinabuhi?
Hinaot unta nga kini ang atong himuon nga sumbanan sa atong pagpalit og bakuna batok sa Covid-19.
Hinaot nga dili ta magpalabi og barat o daginot kay dili baya katugbangan og bisan unsa nga salapi ang kinabuhi sa tawo. (bobbygnalzaro@gmail.com)