NAGPAGAWAS og dugang polisiya ang kagamhanang probinsiyal sa Davao Occidental alang sa gilaumang pagdagsa sa mga bisita ning panahon sa "holiday season" taliwa sa giatubang nga suliran sa pandemya.
Subay sa gilagdaang Executive Order number 49 ni Governor Claude Bautista, adunay dugang guidelines sa pagdumala sa ilang utlanan.
Mga locally stranded individuals ug mga non-resident sa probinsiya kinahanglan nga magdala og "acceptance letter" gikan sa ilang barangay, medical certificate nga balido sud sa lima ka adlaw, valid government identification card (ID) o ID card sa gitrabahoang kompaniya ug negatibong resulta sa swab test nga epektibo gikan 72 ngadto 96 ka oras.
Mga aktibidad kinahanglan nga himuon sa hamubo nga panahon lang ug di kalimtan ang pagsul-ob og face mask sa tanang motambong sa aktibidad.
Bisan ang tanang ahensiya sa nasudnong pangagamhanan o representante kinahanglan nga adunay pagtugot sa Provincial o Municipal Inter-agency Task Force sa ilang mga aktibidad, ilabi na sa mass gatherings, aron malikay sa kasong administratibo.
Mga family gatherings kinahanglan sab nga hamubo lang ang oras sa paghimo niini ug bugtong mga "immediate family members" o nagpuyo sa usa ka balay lamang ang motambong niini nga himuon sa mga lugar nga dunay igong bentilasyon. (Orlando B. Dinoy)