Mibalik na sa naandan operasyon ang nabantog nga floating restaurant sa Barangay Caw-oy, isla sa Olango, Lapu-Lapu City human sa pito ka buwan nahunong ang negosyo resulta sa coronavirus disease (Covid-19).
Kon ang lalawigan sa Bohol adunay Loboc River Floating Restaurant, wa magpa-iwit ang Dakbayan sa Lapu-Lapu sa maong matang sa industriya, gani inila sab kini sa mga langyaw ug ubang local tourist.
Sa kadtong buot nga magpalahi sa ilang panagtapok o salo-salo uban sa inyong mga sakop sa pamilya, higala o kauban sa trabaho nga mag-outing, inay sa naandang restaurant nga nahimutang sa mga dagkong establisemento.
Ania ang floating restaurants sa Barangay Caw-oy nagtanyag og lahi nga ambience o dining experience.
Usa na niini ang floating restaurant nga gipanag-iya ni Candelaria Bolocboloc, 76, nga ginganlan og Arnold and Candie Floating Restaurant nga taod-taod na sab sa maong matang sa negosyo.
SUTUKIL
Ang matang sa pagluto sa mga buhi nga kuha nga seafoods mao ang sugba, tuwa (tinuwa), kilaw (Sutukil).
Apan adunay laing variety sa luto depende sa request sa guest, sama sa sweet and sour fish, spicy crabs, garlic shrimps, calamari ug uban pa.
Nag-offer sab sila og saang kon sa iningles pa spider shells.
Sa kadtong moangal sa presyo kay medyo mahal diin ang uban mihulagway nga susama og kantidad kon mag-fine dining sa mahalong restaurant, kini gumikan kay buhi ang seafood nga luto-on nga presko o nagkisi-kisi pa.
Ang live fish o ubang matang sa seafood anaa sa hawla o fish net nga gibutang ilawom sa restaurant aron ihumol sa dagat diin mopili ang guest ug magdepende ang kantidad sa matag kilo nga paliton.
Apan sigurado dili kamo magmahay sa kantidad nga inyong gibayad tungod kay lami ang pagkaluto, ug siguradong presko ang ingredients.
Dagsaan kini kaniadto sa mga foreign tourist sa dihang wa pa moulbo ang pandemiya.
COVID
Si Bolocboloc sa iyang bahin mitug-an nga sa dihang gipatuman ang lockdown niadtong hinapos nga bahin sa Marso ning tuiga, nayabo ang ilang panginabuhian.
Giguba sa pandemiya ang dagan sa turismo dili lang sa mga nagnegosyo og floating restaurant apan ang kinatibuk-ang isla sa Olango.
“Sa wa pa ang Covid, naa nay manawag dire kay magpa-reserve nang daan, kon pila ka table ang ilang ma-okupar. Mag-prepare na mi ana,” handom ni Bolocboloc.
Normal kaniadto nga usa ka baruto nga nga puno sa mga mangaon ang motabok paingon sa ilang floating restaurant.
Aduna pay higayon nga kapin sa 200 ka guest ang midagsa sa ilang kan-anan sa dihang adunay celebrity nga miduaw sa Olango.
Niadtong Septiyembre 2020 nibalik sa operasyon ang floating restaurant sa Caw-oy human nga mitugot ang Inter-Agency Task Force (IATF) nga moabli ang mga kan-anan sa kondisyon nga 50 porsento lang ang dawaton nga customer, ug ang pagtuman sa health protocol.
“Karon kalit-kalit lang ang kostumer. Ginagmay nalang, naay lima ka tawo ngadto sa 10. Alkansi mi sa live namong seafoods,” saysay ni Candelaria.
MENU
Ania ang presyo sa pipila ka seafoods per kilo dala na sa maong rate ang pagluto base sa request sa guest.
Pansat–15 pieces, P450; squid/pusit–P350 per serving; abalone–1,200 per kilo; pugapo fish–P950 per kilo; surgeon fish–P750 per kilo; rabbit fish–P650 per kilo; saang shells–30 each.
Apan dili mabalaka ilabi na niadtong nag-budget kay adunay set meal nga pito ka putahe ang i-serve nga nagkantidad og tag-P500 matag tawo.
Lakip sa maong set menu ang unlimitied rice aduna pay one round sa softdrinks ug aduna ka nay crabs, isda, pork barbeque, calamares, spicy octopus, saang ug shrimps.
UNSAON PAG-ADTO?
Ang mainland Lapu-Lapu adunay duha ka pantalan diin ang pumpboat ug barge mobiyahe sa isla sa Olango nga anaa sa Punta-Engaño Wharf (Hilton wharf kaniadto) ug Angasil wharf sa Barangay Mactan.
Kon manukad sa Hilton Wharf ang pumpboat o barge adunay pletehan nga P30 ngadto sa P35 matag tawo, laing P5 nga terminal fee.
Sa adunay private vehicle mamahimong isakay sa barge sa pletehan nga P680 one way.
Samtang sa Angasil Wharf maningil sab og P35 nga pletehan matag pasahero apan way bayranan nga terminal fee.
Inig dunggo sa Santa Rosa Wharf makasakay ra sab mo gilayon og traysikol nga nag-atang diha sa terminal sa pletehan (base fare) nga P40 matag pasahero, apan magdepende sa gilay-on sa rota nga inyong adtuon.
Sa pag-abot sa Barangay Caw-oy adunay gagmay baruto nga nagpaabot sa baybayon nga maoy mohatod sa floating restaurant.
Kon hunas ang dagat mamahimong moubog sa dagat nga magbaktas paingon sa kan-anan, ilabi na niadtong gusto og thrill o adventure.
Mahupay ra ang inyong kakapoy gikan sa biyahe inig taak sa restaurant gumikan sa kahayahay sa maong dapit ug malinawon nga layo sa kasaba sa siyudad.