Ang budget kun gahin sa nagkalainlaing local government unit, ingon man sa national government, maoy kanunay nga masugamak sa duwa sa magka-atbang nga pulitiko. Dinhi moduwa ang gitawag og tyranny of numbers kun ang gahum sa mayoriya nga sakop sa konseho ug kongreso. Kadaghanan ang ilang baruganan kun pagbuto dili alang sa kaayuhan sa katawhan apan alang paglig-on sa ilang partido.
Ang ubang mga nasud, sama sa Amerika, walay kalainan sa atong nasud kon maghisgot sa budget. Ang administration party kinahanglan nga mo-mayoriya sa mga konseho ug kongreso nga maoy mutoki ug mo-aprobar sa budget. Ang ubang mga administrasyon nga adunay mga sakop nga nagkalainlain ang partido mohimo og coalition aron masiguro nga mapasar ang mga resulosyun ug balaudnon nga ilang paga-butohan.
Apan lahi dinhi sa Cebu City kay ang mga sakop sa administrasyon, nga gipaabot nga magpaluyo sa mayor, usahay motalay na man sa oposisyon kon maghisgut og budget. Ehemplo niini ang budget alang sa tuig 2021 diin gihingut-an pag-ayo sa oposisyon nga gidasunan usab sa ubang mga sakop sa administrasyon.
Gani ang inilang editor ug kulomnista nga si manlalaban Pachico A. Seares nagtuo nga kon si Bise Mayor Mike Rama magpadayon sa pag-fiscalize ug pagbabag sa 2021 budget tingalig mabugto na ang relasyun nila ni Mayor Edgardo Labella. Talagsaon kining sitwasyon sa siyudad sa Sugbo nga gidominar unta sa mga sakop sa administrasyon ang konseho apan mao na man hinuon ang babag sa pagpalusot unta sa 2021 budget. Kon dili mapasar ang 2021 budget, ang mo-epekto mao ang gahin karong tuiga. Dili na mapatuman sa administrasyon ang mga proyekto nga makatabang unta kanila. Tyranny of numbers alang sa kaayuhan sa kinabag-ang katawhan o alang ba paglig-on sa ilang kandidatura sa eleksiyon sa tuig 2022?
Kinsa may responsable sa pag-ukopar sa ex-Jaguar KTV bar nga wala pay naaprubahang kontrata? Suma ni Mayor Edgardo Labella nga wala pa muabot sa iyang lamisa ang kontrata o memorandum of agreement sa pag-abang sa maong dapit. Dili siya uyon nga ang Siyudad mo-abang niini og P500,000 ang buwan.
Nasayran nga ang Sta. Rita Casela Women’s and Children Center mi-ukopar na niini sukad pa sa Septiyembre. Nakabayad na ba ang city hall ngadto sa Alpha Estate nga maoy tag-iya niining maong dapit bisan way kontrata? Dili kaha kini maparihas niadtong gikatahong pagpalit sa tuob sets nga nahug nga gidonar nalang sa tag-iya ang ila untang kita ngadto sa Siyudad?
Alang kanako kini maoy isyu nga makahatag og negatibong imahen sa administrasyon ni Mayor Labella. Magtuo ang katawhan nga wala siyay kuntrolar sa iyang mga tawo. Hinaut usab nga unta nga ang mga dumadapig sa mayor dili mu-aboso aron dili mabutang sa bakikaw nga kahimtang si Mayor Labella.