Nabalaka si Cebu City Councilor Nestor Archival, minority floor leader sa City Council, nga mabangkaruta ang Siyudad ug mahurot nag gasto ang halin sa South Road Properties (SRP) sa di pa maimpas ang utang alang sa pag-develop niini.
Uwahi na kaayo ang kabalaka ni Archival. Sa dihang si Vice Mayor Mike Rama pay mayor, gusto niyang gamiton ang halin sa SRP aron maimpas ang utang niini. Apan gibabagan siya sa konseho nga gidominar sa Bando Osmena Pundok Kauswagan (BOPK).
Pagbanos ni kanhi mayor Tomas Osmena, samot nga di magamit ang halin sa SRP. Karon nga si Edgardo Labella nay mayor ug magamit na ang halin sa SRP, way nisugyot nga impason una ang utang niini. Mahurot gyud nang halin sa SRP, gawas kon di mapasar ang P10.8 bilyones nga budget sa 2021.
Hain na man diay tuod ang halin sa SRP? Si Cebu City Councilor Raymond Alvin Garcia niingon nga kon madayon ang paggamit og P3 bilyones sa halin sa SRP alang sa 2021 budget, P2.5 bilyones na lang ang mahabilin sa halin sa SRP.
Sa dihang si Rama pay mayor, ang syudad nibaligya niadtong 2015 og 45.5 ka ektaryang mga luna sa SRP sa kantidad nga P16.7 bilyones. Ang consortium sa Ayala Land, Cebu Holdings Inc. ug SM Prime Holdings nipalit og 26.3 ka ektaryang balor og P10.009 bilyones. Ang Filinvest Land Inc. nipalit og 19.2 ka ektaryang balor og P6.7 bilyones.
Kay matod pa ni Konsehal Garcia P2.5 bilyones na lang ang mahabilin kon kuhaan og P3 bilyones, duna pay nahabilin nga P5.5 bilyones ang halin sa SRP. Sa ato pa, nagasto na ang P11.2 bilyones. Hain man kaha kini paingon?
Si Mayor Edgardo Labella masaligon nga di ma-bankrupt ang Siyudad bisan pa kon gamiton ang P3 bilyones sa halin sa mga lote nga SRP alang sa giproponer nga 2021 budget kay ang Siyudad aduna pay igo nga revenues.
Matod niya nigamit ang unang administrasyon sa halin sa SRP bisan normal pa ang sitwasyon ug bisan duna pa kitay igong tinubdan sa revenues. Labaw pang mogamit ang Siyudad karon samtang ubos kita sa usa ka state of emergency, matod niya.
Tugotan nato nga di mabangkaruta ang Siyudad, apan unsa man ning komentaryo sa mga konsehal nga “not pandemic-responsive” ang giproponer nga 2021 budget? Di sab kaha magaid ang 2021 budget sa kapakyas sa administrasyon sa pag-liquidate sa P3.5 bilyones nga lump sum “anti-Covid-19 response”?