Ang tagdumala sa Vallacar Transit nga maoy nag-operate sa Ceres Bus Line misuwat ngadto kang Konsehal James Cuenco, kinsa maoy chairman sa committee on transportation sa konseho, nga nangayo og exemption nga dili sila palukaton og travel line ingon man pag-isyo og mga identification card (IDs) sa ilang mga driver. Aw, okey ra man nang manghangyo ba. Pero ang nakaparat kay nanghulga ang management nga kon dili aksiyonan ang ilang hangyo, mohunong sila og biyahe sa mga dakbayan sa Metro Cebu ug mobalik sa ilang karaang rota sa probinsiya.
Pastilan no. Morag arogante naman kaayo ni sila kay nagtuo nga dako silang kompaniya. Arogante, pagpanglingla, pagpang-hostage ug economic sabotage kon himuon. Unya moyuko lang ba ug magpa-awot ang atong mga opisyal? Hinuon, mibahad si Cuenco nga i-deklarar silang persona non grata kon ilang idayon. Ang persona non grata diplomatic term nga “dili ka welcome.”
Kana maoy maayo. Mangisog pod ang atong mga opisyal.
Adunay termino sa Biology nga gitawag og symbiosis. Unsay ipasabot niini? It is a close and long term inter-action between two different organisms. Sama sa panag-uban sa usa ka negusyo ug katilingban nga iyang nahimutangan. Ang katilingban ug ang negosyo aduna nianang gitawag nga “symbiotic relationship.”
Ang negusyo nabuhi gumikan sa sosyidad ug ang sosyidad nagsalig usab sa negosyo. Mamatay ang usa kon wa ang usa. Apan ang sosyidad adunay kahimanan nga gitawag og “government” nga naghupot og bug-at nga mga gahum nga mao ang mopitol sa negosyo. Ilabi na kon maghinobra na ang kadako sa ulo sa mga negosyante nga mohulga na sa “welfare of the general public.” Sa kadaghan na nga higayon gipakita ning maong mga negosyo nga makasayon-sayon sila paghulga sa gobiyerno.
Susama niining Ceres bus company nga mihulga nga mamiya sa Sugbo kon palukaton sila sa mga rekisito para sila maka operate sama sa travel line ug IDs sa ilang drivers. Nalimot sila sa ilang gipanumpaan sa ilang prangkisa nga ipatigbabaw ang kaayuhan sa katawhan sa tanang higayon ilabi na gyud ning panahon sa emerhensiya gumikan sa Covid-19 pandemic. (bobbygnalzaro@gmail.com)