Kon magkugi lang ang mga awtoridad sa ilang imbestigasyon, masulbad ang krimen. Unya duyogan sab sa mga saksi ug mga ebidensya gamit ang teknolohiya.
Kinsa bay magtuo nga madakpan gilayon ang suspetsadong gunman ni manlalaban Joey Luis Wee, kinsa gipatay gawas sa iyang buhatan niadtong Nobiyembre 23, 2020? Paspas ang imbestigasyon sa National Bureau of Investigation. Ingon sa positive kaayo si NBI 7 Regional Director Renan Oliva nga ang ilang nadakpan mao ang gunman ni Wee. Nisamot pa kay “with prayers” ang ilang pagpadagan sa imbestigasyon.
Maayo ni nga balita nga dunay high profile nga krimen nga nasulbad.
Apan pila lang kaha ka mga kaso sa pagpatay ang nasulbad sa mga awtoridad? Maihap lang tingali sa mga tudlo. Maayo gani kay si Wee impluwensyado nga tawo kay gawas nga abogado, daghan siya og koneksyon sa kagamhanan isip kanhi opisyal sa Office of the Solicitor General.
Ang ubang yano nga mga tawo nga gipamatay, labina kon nalambigit sa illegal drugs, bisan usa lang ka tikang sa pagsulbad sa krimen, wa gyud. Sa ginaingon pa “hanap pa sa diyes panas.”
Kon yano nga abogado pa tingali si Wee, sama sa ubang abogado nga gipatay, “blank wall” ra sab ang dagan sa imbestigasyon.
Hinuon, nakatabang usab ang kooperasyon sa pamilya, labina ang asawa, sa pag-ila sa gunman. Nakatabang usab ang mga close circuit television (CCTV) camera footage sa pag-ila sa mga suspek, usa kanila sa Laguna pa nadakpan niadtong Martes.
Hinaut pang ang mga ebidensya nga nakuha igo ug magtumbok si kinsa ang mastermind sa krimen.
Hinaut usab nga ang mga awtoridad magkugi sa pag-imbestigar sa mga kaso sa pagpatay bisan sa pipila lang sa bag-ong mga hitabo, sama sa usa ka negusyanteng babaye nga gipatay sa Guadalupe ug konsehal sa barangay sa Kinasang-an. Masulbad ba sab kaha ni sama sa kang Wee?